काठमाडौँ । राष्ट्रिय प्रजातन्त्र पार्टी (राप्रपा)का सांसद ज्ञानेन्द्र शाहीले प्रधानमन्त्रीको शपथ लिन लागेका बालेन्द्र शाह (बालेन)लाई देशका २२ प्रमुख भ्रष्टाचार काण्डहरूको निष्पक्ष छानबिन गर्न आह्वान गरेका छन्।
सामाजिक सञ्जालमार्फत सन्देश जारी गर्दै शाहीले बालेन शाहको नेतृत्वसँगै देशमा नयाँ आशा पलाएको बताएका छन्। उनले भ्रष्टाचारविरुद्धको लडाइँमा आफूले भोगेका पीडा र संघर्ष स्मरण गर्दै अबको नेतृत्वले दोषीहरूलाई कानुनी कठघरामा उभ्याउने विश्वास व्यक्त गरेका छन्।
शाहीले वि.सं. २०७६ साल जेठ १५ र असोज ११ गते सुर्खेत र चितवनमा आफूमाथि भएको साङ्घातिक हमलाको प्रसंग पनि उठाएका छन्। भ्रष्टाचारविरुद्ध आवाज उठाएकै कारण आफू ज्यान जोखिममा परेको उल्लेख गर्दै उनले भने, “संसद् सदस्यका रूपमा करिब साढे दुई वर्षसम्म भ्रष्टाचारविरुद्ध आवाज उठाउँदा घाँटी दुख्यो, तर कार्यान्वयन हुन सकेन। तर आज आशा जागेको छ।”
