सर्लाही । हालै सम्पन्न प्रतिनिधिसभा सदस्य निर्वाचनमा सर्लाही–४ बाट प्रतिस्पर्धा गरेका ३५ जना उम्मेदवारको जमानत जफत भएको छ।
जमानत जफत हुनेहरूमा नेपाल कम्युनिस्ट पार्टी (नेकपा) का उम्मेदवार रजनीश राय यादव, जनमत पार्टीका उम्मेदवार राकेश मिश्र, राष्ट्रिय प्रजातन्त्र पार्टी (राप्रपा) का उम्मेदवार प्रदिप झा, जनता समाजवादी पार्टी (जसपा) का उम्मेदवार रामेश्वर राय, प्रगतिशील लोकतान्त्रिक पार्टी (प्रलोपा) का राम चरित्र सहनी लगायत विभिन्न दल र स्वतन्त्र उम्मेदवारहरू रहेका छन्।
यस क्षेत्रमा राष्ट्रिय स्वतन्त्र पार्टी (रास्वपा) का उम्मेदवार अमरेश कुमार सिंहले ३५ हजार ६ सय ८८ मत प्राप्त गर्दै विजय हासिल गरेका छन्। उनका निकटतम प्रतिस्पर्धी नेपाली कांग्रेसका सभापति तथा उम्मेदवार गगन थापाले २२ हजार ८ सय ३१ मत प्राप्त गरेका छन्।
नेकपा एमालेका उम्मेदवार अमनिश कुमार यादवले ९ हजार ३ सय ४३ मत प्राप्त गर्दै आफ्नो जमानत जोगाएका छन्।
निर्वाचन कानुनअनुसार कुनै पनि उम्मेदवारले आफ्नो निर्वाचन क्षेत्रमा खसेको कुल सदर मतको कम्तीमा १० प्रतिशत मत प्राप्त गर्न नसकेमा उम्मेदवारी दर्ता गर्दा राखिएको धरौटी रकम जफत हुने व्यवस्था छ। जफत भएको रकम राज्यकोषमा जाने कानुनी प्रावधान रहेको छ।
यस क्षेत्रमा कुल १ लाख २१ हजार १२ मतदाता रहेका थिए। त्यसमध्ये ७७ हजार ९ सय ३१ मत खसेको थियो। खसेका मतमध्ये ७३ हजार ३ सय ६२ मत सदर भएका छन् भने ४ हजार ५ सय ६९ मत बदर भएका छन्।
जमानत जोगाउन कम्तीमा ७ हजार ३ सय ३६ मत आवश्यक थियो। तर जमानत जफत भएका ३५ उम्मेदवारले सो मत संख्या प्राप्त गर्न सकेनन्।
जमानत जफत हुने उम्मेदवारमध्ये जनमत पार्टीका राकेश मिश्रले १ हजार ५ सय ७२ मत र नेकपाका रजनीश राय यादवले १ हजार ४ सय १ मत प्राप्त गरेका छन्। अन्य अधिकांश उम्मेदवारले ५०० मतसमेत कटाउन सकेनन्।
यसैबीच सर्लाहीका अन्य निर्वाचन क्षेत्रमा पनि केही चर्चित उम्मेदवारहरूको जमानत जफत भएको छ। सर्लाही–२ मा राष्ट्रिय मुक्ति पार्टीका उम्मेदवार राजेन्द्र महतो, सर्लाही–३ मा नेपाली कांग्रेसका उम्मेदवार विनोद कुमार खनाल तथा नेकपा एमालेका हरि उप्रेती र सर्लाही–१ मा नेकपाका उम्मेदवार प्रमोद साहको समेत जमानत जफत भएको छ।
