काठमाडौं । गृहमन्त्री ओमप्रकाश अर्यालले प्रतिनिधिसभा सदस्य निर्वाचनका लागि आवश्यक सम्पूर्ण सुरक्षा तयारी पूरा भएको बताएका छन्।
उनका अनुसार निर्वाचन सुरक्षासम्बन्धी एकीकृत सुरक्षा योजना पारित गरी सोही आधारमा सबै सुरक्षा संयन्त्र परिचालन गरिएको छ। सबै सुरक्षा निकाय मतदान स्थलसम्म पुगिसकेको र आवश्यक परेका बेला सुरक्षाको अवस्था नियन्त्रणमा राख्दै सहजीकरण गर्ने व्यवस्था मिलाइएको उनले जानकारी दिए। देशभर पूर्ण रूपमा सुरक्षाको प्रत्याभूति गरिएको उनको भनाइ छ।
गृहमन्त्री अर्यालले निर्वाचनका लागि आवश्यक सबै सामग्री सम्बन्धित स्थानमा पुगिसकेको स्पष्ट पारे। मतदानपछिको मतपेटिका नेपाली सेनाले लैजाने भन्ने चर्चा सत्य नभएको उल्लेख गर्दै उनले एकीकृत सुरक्षा योजनाअनुसार मतदान सम्पन्न भएपछि मतपेटिका मतदान अधिकृतमार्फत निर्वाचन अधिकृतको कार्यालयमा ल्याइने बताए।
यद्यपि मतपेटिका ढुवानीका क्रममा असुरक्षा महसुस भएमा नेपाली सेनाको सवारी साधनले सुरक्षा स्कर्टिङ गर्न सक्ने व्यवस्था रहेको उनले बताए।
भोलि अर्थात् फागुन २१ गते प्रतिनिधिसभा सदस्यको निर्वाचन हुँदैछ। निर्वाचनलाई स्वच्छ, निष्पक्ष र शान्तिपूर्ण रूपमा सम्पन्न गर्न सरकारले आवश्यक सम्पूर्ण तयारी पूरा गरेको जनाएको छ।
