काठमाडौँ । राष्ट्रिय प्रजातन्त्र पार्टीका प्रवक्ता मोहनकुमार श्रेष्ठले राष्ट्रिय स्वतन्त्र पार्टी (रास्वपा) ले ध्वनि प्रदूषण हुनेगरी घण्टी बजाउँदै निर्वाचन आचारसंहिता उल्लंघन गरेको आरोप लगाएका छन्।
प्रवक्ता श्रेष्ठले जारी गरेको वक्तव्यमा रास्वपाले विभिन्न स्थानमा घण्टी बजाएर ध्वनि प्रदूषण गराएको दाबी गर्दै निर्वाचन आयोगको ध्यानाकर्षण गराएका छन्। साथै उनले राजा वीरेन्द्रको शालिकमाथि चढेर झण्डा जलाउनेजस्ता गतिविधिप्रति आपत्ति जनाएका छन्।
वक्तव्यमा भनिएको छ, “निर्वाचन आचारसंहिताको पालना गर्ने र गराउने सवालमा आयोग गम्भीर हुनुपर्छ। घण्टी चिन्ह भएको दलले ध्वनि प्रदूषण हुने गरी देशव्यापी रूपमा घण्टी बजाउँदै आचारसंहिता उल्लंघन गरिरहँदा आयोगले नदेखेजस्तो, नसुनेजस्तो गर्नु विडम्बनापूर्ण छ।”
उनले उदाहरण दिँदै प्रश्न गरेका छन्, “यदि खुकुरी चिन्ह भएको दलले खुकुरी नचाउँदै हिँड्ने, वा डोजर चिन्ह भएको दलले सडक अवरुद्ध हुने गरी डोजर चलाउँदै हिँड्ने अवस्था आयो भने आयोगका लागि त्यो पनि स्वीकार्य हुन्छ?”
प्रवक्ता श्रेष्ठले रास्वपाले गरेका भनिएका दुव्र्यवहार, झण्डा जलाउने र शालिकमाथि चढ्ने गतिविधिप्रति सार्वजनिक रूपमा माफी माग्नुपर्ने मागसमेत गरेका छन्।
