धनगढी। उज्यालो नेपाल पार्टीका अध्यक्ष कुलमान घिसिङ शनिबार कैलालीको अत्तरियामा आयोजित पार्टी सभामा उपस्थित नहुँदा कार्यकर्तामा निराशा छाएको छ। अध्यक्ष घिसिङले मध्याह्न १२ बजे गोदावरी नगरपालिका–अत्तरियामा हुने भेलालाई सम्बोधन गर्ने पूर्वनिर्धारित कार्यतालिका रहेको थियो।
उज्यालो नेपाल पार्टीको गोदावरी नगर कमिटीले कार्यक्रमका लागि मञ्च व्यवस्थापन, उद्घोषक तथा अन्य आवश्यक तयारी पूरा गरेको जनाएको थियो। अध्यक्ष घिसिङ कैलाली र कञ्चनपुरका विभिन्न कार्यक्रममा सहभागी भइरहेका कारण अत्तरियाको कार्यक्रमलाई विशेष महत्वका साथ हेरिएको थियो।
तर निर्धारित समयसम्म अध्यक्ष घिसिङ कार्यक्रम स्थलमा नपुगेपछि कार्यकर्ताहरू अन्योलमा परेका थिए। केही समय प्रतीक्षापछि उनी कार्यक्रममा उपस्थित नहुने जानकारी आयोजक पक्षबाट सार्वजनिक गरिएको थियो। प्रारम्भमा अनुपस्थितिको स्पष्ट कारण खुलाइएको थिएन।
पछिल्लो जानकारी अनुसार कार्यव्यस्तताका कारण अध्यक्ष घिसिङ अत्तरियाको सभामा आउन नसकेको बताइएको छ। कार्यक्रममा उज्यालो नेपाल पार्टीका उपाध्यक्ष राजेश पर्तेलको प्रमुख आतिथ्यतामा सभा सम्पन्न गरिएको थियो। पर्तेलले अन्य स्थानका कार्यक्रमहरूको व्यवस्थापनका कारण अध्यक्ष उपस्थित हुन नसकेको स्पष्ट पारे।
मुख्य वक्ता अनुपस्थित भएपछि कार्यक्रममा सहभागी कार्यकर्ताहरू निराश हुँदै घर फर्किएका थिए।
