धनगढी । फागुन २१ गते हुने प्रतिनिधि सभा निर्वाचनमा सुदूरपश्चिम प्रदेशका केही प्रभावशाली नेताहरू उम्मेदवारको सूचीबाट बाहिरिएका छन्।
कांग्रेसका पूर्वसभापति तथा पाँच पटक प्रधानमन्त्री भइसकेका शेरबहादुर देउवा यसपटक उम्मेदवार छैनन्। एउटै क्षेत्रबाट पटक–पटक निर्वाचित हुँदै आएका देउवा २०७८ यता अपराजित रहँदै आएका थिए। उनले यो आफ्नो अन्तिम चुनाव हुने संकेत दिएका थिए। तर नेपाली कांग्रेसको वर्तमान नेतृत्वले डडेल्धुराबाट उनलाई टिकट नदिई नैनसिंह महरलाई उम्मेदवार बनाएको छ। देउवा चुनावी मैदानबाहिर रहँदा डडेल्धुरामा कांग्रेसलाई आफ्नो प्रभाव जोगाउन चुनौती देखिएको छ। उनी हालसम्म निर्वाचन क्षेत्रमा सक्रिय रूपमा देखिएका छैनन्।
कांग्रेसकै अर्का प्रभावशाली नेता रमेश लेखक पनि यसपटक उम्मेदवार बनेनन्। कञ्चनपुर–३ बाट चुनाव लड्दै आएका लेखकलाई पार्टीले टिकट नदिएपछि उनी बाहिरिएका हुन्। उक्त क्षेत्रमा यसपटक हरि प्रसाद बोहरालाई उम्मेदवार बनाइएको छ। कञ्चनपुर–३ कांग्रेसको बलियो आधार क्षेत्र मानिन्छ, जहाँ लेखक २०५६, २०७० र २०७९ का निर्वाचनमा विजयी भएका थिए।
त्यसैगरी, नेकपा (एमाले) का केन्द्रीय सदस्य कर्ण थापा पनि टिकटबाट वञ्चित भएका छन्। बाजुरालाई राजनीतिक आधार बनाएका थापा २०७० को संविधान सभा निर्वाचनमा विजयी भएका थिए भने २०७९ मा पराजित भएका थिए। पार्टी नेतृत्वसँगको मतभेदका कारण यसपटक टिकट नपाएको चर्चा छ।
बझाङका नेता भानुभक्त जोशी पनि यसपटक उम्मेदवार बन्न पाएनन्। २०४७ सालदेखि संसदीय राजनीतिमा सक्रिय रहेका जोशी एक पटक बाहेक अधिकांश निर्वाचनमा विजयी हुँदै आएका थिए। यसपटक उनको स्थानमा मिनबहादुर कुँवर उम्मेदवार बनेका छन्।
त्यसैगरी, नागरिक उन्मुक्ति पार्टीका संरक्षक रेशम चौधरीको उम्मेदवारी निर्वाचन आयोगले खारेज गरेको छ। फैजदारी मुद्दामा दोषी ठहर भइसकेकाले संविधानअनुसार अयोग्य ठहर गर्दै आयोगले उनको उम्मेदवारी रद्द गरेको हो। चौधरी २०७४ मा जेलबाटै कैलाली–१ बाट निर्वाचित भए पनि संसदमा सहभागी हुन सकेका थिएनन्। २०७९ मा भने उनकी पत्नी रञ्जिता श्रेष्ठ सोही क्षेत्रबाट विजयी भएकी थिइन्।
यसपटक सुदूरपश्चिमका यी चर्चित अनुहारहरू चुनावी प्रतिस्पर्धाबाट बाहिरिँदा प्रदेशको राजनीतिक समीकरणमा नयाँ परिस्थिति सिर्जना भएको छ।
