रौतहट । रौतहटको गौर नगरपालिका वडा नं. ६ सवगढामा केही समयदेखि देखिएको विवाद समाधान गर्न स्थानीय जनप्रतिनिधि, समाजसेवी तथा सरोकारवालाबीच ६ बुँदे सहमति भएको छ। फागुन ८ गते बसेको सर्वपक्षीय बैठकले गाउँमा शान्ति सुरक्षा र आपसी सद्भाव सुदृढ बनाउने निर्णय गरेको हो।
बैठकले गाउँको सामाजिक सद्भाव विथोल्न खोज्ने तत्वप्रति सामूहिक खेद व्यक्त गर्दै यस्ता गतिविधि निस्तेज पार्ने प्रतिबद्धता जनाएको छ। स्थानीय प्रशासन र नेपाल प्रहरीसँग समन्वय गर्दै शान्ति सुरक्षा कायम राखिने जनाइएको छ।
सहमति अनुसार गाउँमा रहेका बालबालिका, ज्येष्ठ नागरिक, गर्भवती महिला, बिरामी तथा अपाङ्गता भएका व्यक्तिहरूको संवेदनशीलतालाई ध्यानमा राख्दै धार्मिक तथा सांस्कृतिक कार्यक्रमहरू आपसी समझदारी र सौहार्दपूर्ण वातावरणमा मात्र सञ्चालन गरिनेछ।
पुर्खादेखि कायम रहँदै आएको सामाजिक सद्भावलाई निरन्तरता दिने, २०८१ चैत ६ गते भएको सर्वपक्षीय सहमतिको अक्षरशः पालना गर्ने तथा विवाहको लगन र मुस्लिम समुदायको पवित्र महिना रमजान नजिकिँदै गरेको सन्दर्भमा एक समुदायले अर्को समुदायको संस्कृतिको सम्मान गर्ने विषयमा पनि सहमति भएको जिल्ला प्रहरी कार्यालय रौतहटका प्रवक्ता एवं डीएसपी विष्णुप्रदीप वस्यालले जानकारी दिए।
त्यसैगरी, कुनै पनि प्रकारका अवरोध सिर्जना गर्ने व्यक्तिलाई कानुनी दायरामा ल्याउन स्थानीय प्रशासनलाई सहयोग गर्ने तथा आगामी २०८२ फागुन २१ गते हुने प्रतिनिधि सभा निर्वाचनलाई लक्षित गरी शान्तिपूर्ण वातावरण कायम गर्ने निर्णय गरिएको छ।
सामाजिक सञ्जाल वा प्रत्यक्ष रूपमा सद्भाव भड्काउने गतिविधि देखिएमा तत्काल प्रहरीलाई जानकारी गराउने र जिल्ला प्रशासन कार्यालय रौतहटको समन्वयमा कडा कानुनी कारबाही अघि बढाइने सहमति भएको छ।
सहमति पश्चात् सवगढावासीले गाउँमा शान्ति, एकता र भाइचाराको वातावरण पुनः स्थापित हुने विश्वास व्यक्त गरेका छन्।
