काठमाडौँ । मौसम पूर्वानुमान महाशाखाका अनुसार हाल देशभर पश्चिमी न्यून चापीय प्रणालीको प्रभाव कायम रहेको छ। यसका कारण विभिन्न प्रदेशका हिमाली तथा पहाडी क्षेत्रमा बदलीको अवस्था देखिएको छ भने तराईका केही स्थानमा हुस्सु लागेको छ।
आज दिनभर कोशी, बागमती र गण्डकी प्रदेशका हिमाली भेगमा साधारणतया बादल लाग्नेछ। मधेस प्रदेशलगायत कोशी, बागमती र गण्डकी प्रदेशका बाँकी भाग तथा अन्य प्रदेशका हिमाली र पहाडी क्षेत्रमा आंशिक बदली रहनेछ। कोशी, बागमती र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा तथा हिमपातको सम्भावना रहेको महाशाखाले जनाएको छ।
आज राति पनि तराईका केही स्थानमा तुवाँलो लाग्ने पूर्वानुमान गरिएको छ। कोशी, मधेस, बागमती र गण्डकी प्रदेशमा आंशिक बदली रहनेछ भने अन्य प्रदेशमा मुख्यतया मौसम सफा रहने बताइएको छ। विशेषगरी कोशी प्रदेशका उच्च पहाडी तथा हिमाली भेगका एक–दुई स्थानमा हल्का वर्षा तथा हिमपात हुन सक्ने सम्भावना रहेको छ।
महाशाखाले हुस्सु, तुवाँलो तथा हिमपातको सम्भावना रहेका क्षेत्रका बासिन्दा तथा ती क्षेत्रमा यातायात सञ्चालन गर्नेहरूले सावधानी अपनाउन आग्रह गरेको छ। दैनिक जनजीवन र आवागमनमा असर पर्न सक्ने भएकाले आवश्यक सतर्कता अपनाउन सबैमा अनुरोध गरिएको छ।
