मलंगवा (सर्लाही) । सर्लाही निर्वाचन क्षेत्र नम्बर ३ का प्रतिनिधि सभा सदस्य पदका उम्मेदवार डा. जेपी यादवमाथि बागमती क्षेत्रमा दुव्र्यवहार भएको घटनाप्रति जनता समाजवादी पार्टी (जसपा), नेपालले गम्भीर आपत्ति जनाएको छ।
बिहीबार जिल्ला सदरमुकाम मलंगवामा आयोजित पत्रकार सम्मेलनमा डा. यादवले बुधबार दिउँसो चुनावी भेटघाटका क्रममा आफूमाथि असभ्य र जातीय टिप्पणीसहितको व्यवहार भएको बताएका हुन्। उनका अनुसार एक व्यक्तिले अपमानजनक शब्द प्रयोग गर्दै ‘मधेशीहरू बीस–तीस रुपैयाँको खान्छन्, यहाँबाट भाग’ भन्ने अभिव्यक्ति दिएका थिए। साथै ‘मधेशीहरूको ओकात थोरै छ’ भन्दै जातीय रूपमा होच्याउने प्रयास गरिएको उनले बताए।
डा. यादवले लोकतान्त्रिक अभ्यासअन्तर्गत मतदातासँग संवाद गरिरहेका बेला यस्तो घटना हुनु दुःखद भएको उल्लेख गर्दै मधेशी समुदायमाथि हुने कुनै पनि प्रकारको विभेद अस्वीकार्य रहेको स्पष्ट पारे। उनले घटनाको कडा निन्दा गर्दै दोषीमाथि कानुनी कारबाही गर्न माग गरे।
कार्यक्रममा जसपा सर्लाहीका जिल्ला अध्यक्ष रन्धिर यादवले घटनाको निष्पक्ष छानबिन गरी संलग्न व्यक्तिलाई कानुनी दायरामा ल्याउन सम्बन्धित निकायसँग माग गरे। कारबाही प्रक्रियामा ढिलाइ भए वा दोषीलाई उन्मुक्ति दिन खोजिए आन्दोलनका कार्यक्रम घोषणा गरिने उनले चेतावनी दिए। साथै आगामी निर्वाचन शान्तिपूर्ण, सुरक्षित र भयमुक्त वातावरणमा सम्पन्न गर्न सुरक्षा संयन्त्रलाई थप सक्रिय बनाउन आग्रह गरे।
त्यसैगरी, पूर्व लोसपा जिल्ला अध्यक्ष तथा हाल जसपाका नेता रामप्रसाद यादवले निर्वाचन स्वतन्त्र र निष्पक्ष वातावरणमा सम्पन्न हुनुपर्नेमा जोड दिँदै स्वस्थ राजनीतिक प्रतिस्पर्धाका लागि सबै दल र सरोकारवाला पक्ष जिम्मेवार बन्नुपर्ने बताए।
यस सम्बन्धमा जिल्ला प्रहरी कार्यालय सर्लाहीले एक जनालाई नियन्त्रणमा लिएर अनुसन्धान अघि बढाएको जनाएको छ। प्रहरीका अनुसार घटनामा संलग्न रहेको आरोपमा स्थानीय प्रसान्त वाइवा पक्राउ परेका छन्।
