भक्तपुर । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै विभिन्न राजनीतिक दलहरूले घरदैलो अभियान सुरु गरेका छन्। भक्तपुर क्षेत्र नं. १ र २ मा उम्मेदवारी दिएका प्रमुख दलहरूले आजबाट मतदातामाझ पुग्ने कार्यक्रम अघि बढाएका हुन्।
नेकपा (एमाले), नेपाली कांग्रेस, नेपाल मजदुर किसान पार्टी, राष्ट्रिय प्रजातन्त्र पार्टी तथा राष्ट्रिय स्वतन्त्र पार्टी लगायतका दलहरूले दुवै क्षेत्रमा घरदैलो अभियान थालेका छन्। अन्य दल र स्वतन्त्र उम्मेदवारहरूले पनि प्रचारप्रसारलाई तीव्र बनाएका छन्।
भक्तपुर क्षेत्र नं. २ यसपटक विशेष चासोको केन्द्र बनेको छ। महेश बस्नेत ले यस क्षेत्रबाट चौथो पटक उम्मेदवारी दिएका छन्। यसअघि २०७० सालको निर्वाचनमा उनी रामेश्वर ढुंगेलसँग पराजित भएका थिए भने २०७४ सालमा दमननाथ ढुंगानालाई पराजित गरेका थिए। २०७९ सालको निर्वाचनमा भने दुर्लभ थापा २४ हजार २३८ मतसहित निर्वाचित हुँदा बस्नेत २३ हजार २७९ मतसहित पराजित भएका थिए।
यसपटक बस्नेतसँगै नेपाली कांग्रेसका तर्फबाट पत्रकार कबिर राणा, राष्ट्रिय स्वतन्त्र पार्टीबाट पत्रकार राजीव खत्री तथा नेपाल कम्युनिष्ट पार्टीका रामप्रसाद सापकोटा ‘दिपशिखा’ प्रतिस्पर्धामा छन्।
उम्मेदवारहरूले विकास, सुशासन तथा स्थानीय समस्या समाधानलाई मुख्य एजेण्डा बनाउँदै घरघर पुगेर मत मागिरहेका छन्। एमालेका बस्नेतले ‘समृद्ध र सुखी भक्तपुर’ निर्माणको मुद्दा अघि सारेका छन् भने कांग्रेसका राणाले भक्तपुरको समग्र विकासलाई प्राथमिकता दिएका छन्। रास्वपाका उम्मेदवार खत्रीले नयाँ नेतृत्वलाई अवसर दिनुपर्ने धारणा व्यक्त गरेका छन् भने दिपशिखाले दलगत सहकार्य र जनविश्वासका आधारमा विजय हासिल गर्ने दाबी गरेका छन्।
यस क्षेत्रमा विभिन्न दलका उम्मेदवारसँगै ठूलो संख्यामा स्वतन्त्र उम्मेदवारहरू पनि चुनावी मैदानमा उत्रिएका छन्। निर्वाचन नजिकिँदै जाँदा भक्तपुरमा चुनावी माहोल थप तातेको छ।
