काठमाडौँ । पूर्वमन्त्री तथा राष्ट्रिय प्रजातन्त्र पार्टी का वरिष्ठ नेता विश्वबन्धु थापा को निधन भएको छ।
राप्रपा प्रवक्ता मोहन कुमार श्रेष्ठ का अनुसार थापाको शनिबार साँझ ९८ वर्षको उमेरमा निधन भएको हो।
श्रेष्ठका अनुसार २००७ सालदेखि पछिल्लो समयसम्मका राजनीतिक घटनाक्रमका साक्षी रहेका थापाको निधनले देशले एक इतिहास पुरुष गुमाएको छ भने राप्रपाले आफ्नो अग्रज नेता गुमाएको छ। राप्रपा निर्माण तथा विस्तारमा स्वर्गीय थापाको योगदान सदैव सम्मानपूर्वक स्मरणीय रहने उनले उल्लेख गरे।
थापा तत्कालीन राजा महेन्द्र वीर विक्रम शाह ले वि.सं. २०१७ साल पुस १ गते जननिर्वाचित प्रधानमन्त्री विश्वेश्वर प्रसाद कोइराला लाई पदबाट हटाएर निर्दलीय पञ्चायती व्यवस्था लागू गरेपछि मन्त्री बनेका थिए।
स्वर्गीय थापा नेपालका प्रभावशाली ऐतिहासिक व्यक्तित्व भीमसेन थापा का पाँचौँ पुस्ताका सदस्यसमेत हुन्।
