काठमाडौं । इरानस्थित अमेरिकी भर्चुअल दूतावासले त्यहाँ रहेका अमेरिकी नागरिकहरूका लागि सुरक्षा सतर्कता जारी गरेको छ। दूतावासका अनुसार इरानमा सडक बन्द हुनुका साथै सार्वजनिक यातायात र इन्टरनेट सेवामा अवरोध भइरहेको छ।
दूतावासले इरानी सरकारले मोबाइल फोन, ल्यान्डलाइन तथा राष्ट्रिय इन्टरनेट नेटवर्कमा पहुँच प्रतिबन्धित गरिरहेको जनाएको छ। साथै, विभिन्न एयरलाइन्सहरूले इरान आउने र जाने उडानहरू प्रतिबन्धित वा रद्द गरिरहेका छन्।
अमेरिकी नागरिकहरूलाई सञ्चारका वैकल्पिक माध्यम प्रयोग गर्न र सुरक्षित अवस्था भएमा आर्मेनिया वा टर्की हुँदै इरान छोड्ने विकल्पबारे विचार गर्न सुझाव दिइएको छ।
यसैबीच, इरान र अमेरिकाबीचको आणविक विषयसम्बन्धी वार्ता शुक्रबार ओमानमा हुने तयारी छ। अमेरिकी राष्ट्रपति डोनाल्ड ट्रम्पले इरानले आफ्नो आणविक कार्यक्रम सीमित गर्न नयाँ सम्झौता नगरे सैन्य कारबाही गर्न सक्ने चेतावनी दिएका छन्।
इरानले भने आणविक कार्यक्रमसम्बन्धी वार्तामा सहभागी हुन तयार रहेको बताउँदै क्षेप्यास्त्र कार्यक्रम सीमित गर्ने लगायतका विषयमा वार्ता नगर्ने अडान दोहोर्याएको छ।
