काठमाडौँ । उपराष्ट्रपति रामसहायप्रसाद यादवले नेपालको ‘विविधतामा एकता’ को भावनालाई झल्काउने तिहार पर्वले विभिन्न क्षेत्र, वर्ग र समुदायबीच परस्पर विश्वास, सद्भाव र भाइचाराको सम्बन्धलाई अझ प्रगाढ बनाउन सहयोग पुर्याउने विश्वास व्यक्त गरेका छन्।
आस्था र उल्लासको पर्व तिहार (शुभ दीपावली)–२०८२ का अवसरमा सोमबार जारी शुभकामना सन्देशमा उनले स्वदेश तथा विदेशमा रहेका सम्पूर्ण नेपाली दिदीबहिनी र दाजुभाइहरूलाई सुख, शान्ति, समृद्धि र सु–स्वास्थ्यको मंगलकामना व्यक्त गर्दै यस्तो विश्वास व्यक्त गरेका हुन्।
उपराष्ट्रपति यादवले भनेका छन्, “शुभ दीपावलीले हाम्रो मन, वचन र कर्ममा पवित्र भावनाहरू जागोस्। सम्पूर्ण नेपाली एकताबद्ध भई राष्ट्रिय एकता, अखण्डता, सार्वभौमसत्ता र राष्ट्रियतालाई अझ मजबुत बनाउन यसले प्रेरणा दिओस्।”
उनका अनुसार तिहारको उज्यालोले हाम्रा मनका रिस, राग, वैमनस्यता र द्वेषलाई मेटाउँदै मेलमिलाप, प्रेम र खुसीयालीको वातावरण सिर्जना गर्नेछ।
पाँच दिनसम्म मनाइने यो पर्वले सामूहिकता र एकताको भावना मजबुत पार्दै सुदृढ र समावेशी समाज निर्माणको प्रेरणा प्रदान गर्ने शुभकामना सन्देशमा उल्लेख छ।
