सिरहा, २४ असार: सिरहा नगरपालिका–६ स्थित भुस्कुलिया टोलका बासिन्दाले दशकौँदेखि झेलेको हिलो र धुलोको पीडा अब अन्त्य भएको छ। हालै निर्माण भएको आरसिसी ढलानको पक्की सडकले कच्ची बस्तीको स्वरूप नै परिवर्तन गरिदिएको छ। बाँसको टाटी, माटो र जस्ताले बनेका घरहरूले भरिएको बस्तीमा टाढैबाट चम्किने पक्की सडकले नयाँ आशा र आत्मसम्मानको अनुभूति गराएको छ।
झण्डै डेढ सय घरधुरी रहेको यो बस्तीमा करिब पाँच सय मिटर लम्बाइको सडक मधेस प्रदेश सरकारअन्तर्गत भौतिक पूर्वाधार विकास मन्त्रालयको २५ लाख रुपैयाँको बजेटमा निर्माण भएको हो। वडाध्यक्ष इन्द्रजित यादवको अगुवाइमा बनेको यस सडकले बस्तीमा परिवर्तनको ढोका खोलेको छ। उहाँ भन्छन्, “हामीले चुनावअघि वाचा गरेका थियौं कि यो बस्तीलाई हिलोमुक्त बनाउनेछौं, आज त्यो सपना साकार भएको छ।”
सडक निर्माणपछि न सानो पानी पर्दा हिलो लाग्छ, न बच्चाबच्ची स्कुल जानुअघि फोहर हुने डर हुन्छ। वृद्धवृद्धा सजिलै हिँड्न सक्छन्, पाहुनालाई स्वागत गर्न अब लाज मान्नुपर्ने अवस्था छैन। स्थानीय सोनु यादव भन्छन्, “पहिले हाम्रो टोलमा मान्छे आउनै चाहँदैनथे, अब भने टोलमा खुसीको माहोल छ।”
वडाध्यक्ष यादवका अनुसार बस्तीमा पाँच घर बाहेक सबै संरचना कच्ची छन् र अधिकांश बासिन्दा निम्न आयस्तरका छन्। सडक, नाला, खानेपानीजस्ता आधारभूत सुविधा वर्षौँदेखि अभावमा रहेका थिए। “हामीले बस्तीको अवस्था हेरेर प्राथमिकतामा राख्दै सडक निर्माण गरेका हौँ,” उहाँले भन्नुभयो, “अब बस्तीको जीवनशैली नै बदलिएको छ।”
सडक निर्माणमा प्राविधिक रूपमा आरसिसी ढलान प्रविधि रोजिएको थियो। पूर्वाधार विकास कार्यालय सिरहाका प्राविधिक राजु यादवका अनुसार ग्रामीण क्षेत्रका लागि यो प्रविधि बढी उपयुक्त देखिएको छ। “कालोपत्र सडकभन्दा आरसिसी ढलान टिकाउ हुन्छ, खासगरी हिलो, पानी र गाईवस्तुको चाप हुने ठाउँमा,” उहाँले बताए।
अबको लक्ष्य: पक्की घर र समग्र विकास
सडक बनेसँगै अब भुस्कुलिया टोलका बासिन्दाले पक्की घर बनाउने सपना देख्न थालेका छन्। वृद्ध लक्ष्मी साह भन्छन्, “पहिले पानी परेपछि घरभित्रै बाल्टिनले हिलो सोस्नुपर्थ्यो, अहिले बाहिर हिँड्न त सजिलो भएको छ, अब त घर बनाउने चाहना छ।”
वडाध्यक्ष यादवका अनुसार बस्तीको समग्र विकासका लागि शिक्षा, स्वास्थ्य, आवास तथा सीप विकास कार्यक्रम ल्याउने तयारी भइरहेको छ। उहाँले जानकारी दिनुभयो, “अहिले सामुदायिक भवन, पिउने पानीको पहुँच र सीपमूलक कार्यक्रमहरू पनि अगाडि ल्याइँदै छन्।”
साँचो अर्थमा, भुस्कुलियाको यो सडक ढलान मात्र होइन—सपना, सम्भावना र सम्मानको बाटो बनेको छ। आज सडक पक्की भएको छ, भोलि घर पक्की हुने विश्वासमा बस्ती बाँच्न थालेको छ।
