मध्यविन्दु (नवलपरासी), ७ असार: पूर्व–पश्चिम राजमार्ग अन्तर्गत नवलपरासी (बर्दघाट सुस्तापूर्व) क्षेत्रको दुम्कीवास–दाउन्ने सडकखण्डमा बाढी र हिलाम्मे अवस्थाका कारण सवारी आवागमन ठप्प भएको छ। लगातारको वर्षासँगै विनयी खोलामा आएको बाढी र सडक निर्माणका क्रममा भत्काइएको मार्गमा चिप्लोपन बढ्दा नारायणगढ–बुटवल खण्ड चार दिनदेखि अवरुद्ध भएको हो।
बिहीबार राति काठमाडौँबाट नेपालगञ्जतर्फ जाँदै गरेको यात्रुबाहक बस (भे १ ख ४०८५) विनयी खोलाको अस्थायी डाइभर्सनमा फसेपछि २४ यात्रुहरूलाई जेसिभीको सहायताले उद्धार गरिएको जिल्ला प्रहरी कार्यालयले जनाएको छ। तीमध्ये बर्दियाका किरण चौधरीले “खोलाबीचमा अलपत्र पर्दा भगवान् सम्झनु बाहेक केही गर्न सकिएन,” भन्दै तीव्र डरको क्षण सम्झिए।
काठमाडौँबाट बर्दिया जाँदै गरेका शिवनारायण थारु त डाइभर्सनमा फसेपछि बाँच्न पानीमा हाम फालेर पौडिएका थिए। “त्यो क्षण म मर्छु जस्तो लागेको थियो, तर भाग्यले बाँचे,” उनले बताए।
सडक अवरुद्ध भएपछि यात्रुहरू घण्टौँ हिँडेरै यात्रा गर्न बाध्य छन्। लामो दूरीका सवारी चालकहरू जङ्गलबीच गाडीमै रात बिताइरहेका छन्। खाना, पानीको अभावले यात्रुहरूको अवस्था निकै कठिन बनेको छ। मालवाहक सवारी साधन पनि बाटोमै अलपत्र छन्।
यात्रुहरूको दु:ख देखेर विनयी त्रिवेणी गाउँपालिका–१ का स्थानीय युवा, व्यवसायी र सामाजिक संघ–संस्थाहरूले शुक्रबार दिनभर निःशुल्क खानाको व्यवस्था गरेका छन्। दुम्कीवास क्षेत्रमा वितरण गरिएको भात, दाल, तरकारी र शुद्ध पानीबाट करिब १,५०० यात्रु लाभान्वित भएको समाजसेवी गोमा बस्यालले जानकारी दिइन्।
यसबीच, प्रमुख जिल्ला अधिकारी भविश्वर पाण्डेले सडक निर्माणका क्रममा भत्काइएको भागमा वर्षा हुँदा हिलाम्मे हुने स्वाभाविक भए पनि ठेकेदार कम्पनीको लापरवाहीले समस्या बढेको बताए। “स्थानीय तह, निर्माण कम्पनी र प्रहरी प्रशासनको समन्वयमा वैकल्पिक व्यवस्था खोजिने प्रयास भइरहेको छ,” उनले भने, “तर यात्रुले अझै केही दिन सास्ती भोग्नुपर्ने देखिन्छ।”
विसं २०७५ सालदेखि विस्तारको नाममा भत्काइएको नारायणगढ–बुटवल खण्डको दुम्कीवास–दाउन्ने खण्डमा समस्या दिनप्रतिदिन बढ्दो छ। विनयी खोलामा बनाइएको अस्थायी डाइभर्सन खोलामा बाढी आउँदा बारम्बार बग्ने गरेको छ। जिल्ला प्रहरी कार्यालयका अनुसार हालसम्म ८ पटक डाइभर्सन बगिसकेको छ।
दाउन्ने क्षेत्रको १४ किलोमिटर लामो सडकखण्ड निर्माणाधीन अवस्थामै वर्षा हुँदा अत्यधिक हिलाम्मे र जोखिमयुक्त बन्न पुगेको छ। स्थानीय प्रशासनले पटक–पटक दबाब दिए पनि ठेकेदार कम्पनीले गिट्टी–बालुवासमेत हालेर मर्मत नगरेको यात्रुहरूको गुनासो छ। यातायात पुनः सञ्चालनमा ल्याउन तत्काल र दीर्घकालीन समाधानको माग चुलिँदो छ।
