काठमाडौँ, १ असार: अन्तर्राष्ट्रिय बजारमा सुनको मूल्य निरन्तर बढिरहेसँगै नेपालको बजारमा पनि सुनको मूल्यमा वृद्धि भएको छ। नेपाल सुनचाँदी व्यवसायी महासङ्घका अनुसार, आज सुनको मूल्य तोलामा ४०० रुपैयाँले बढेर रु १,९७,५०० मा पुगेको छ।
महासङ्घका अनुसार, चाँदीको मूल्य भने स्थिर छ। आज पनि चाँदी प्रतितोला रु २,१६५ मा नै कारोबार भइरहेको छ।
गत जेठ २७ गतेदेखि सुनको मूल्यमा क्रमिक वृद्धि भइरहेको हो। उक्त दिन सुनको मूल्य प्रतितोला रु १,९०,००० रहेको थियो। त्यसयता जेठ २८ गते रु १,९१,३००, जेठ २९ गते रु १,९२,९००, र जेठ ३० तथा ३१ गते रु १,९७,१०० मा सुनको कारोबार भएको थियो।
अन्तर्राष्ट्रिय बजारमा आज सुनको मूल्य प्रति औँस ३,४४८ अमेरिकी डलर पुगेको अन्तर्राष्ट्रिय सञ्चारमाध्यमहरूले जनाएका छन्।
विशेषज्ञहरूका अनुसार, विश्वव्यापी आर्थिक अन्योल, मुद्रास्फीति र लगानीकर्ताहरूको सुरक्षित सम्पत्तितर्फको आकर्षणले सुनको मूल्य चुलिँदो छ।
