काठमाडौं: भारतको गुजरातस्थित अहमदाबादमा एयर इन्डियाको एक अन्तर्राष्ट्रिय विमान दुर्घटनाग्रस्त भएको छ। दुर्घटनास्थलबाट बाक्लो कालो धुवाँ देखिएको छ भने उद्धार टोलीहरू तत्कालै घटनास्थलमा परिचालन गरिएको छ।
विमान उडेको दुई मिनेटमै दुर्घटना
एयर इन्डियाको AI-171 उडान नम्बरको बोइङ ७८७-८ ड्रीमलाइनर विमान बिहीबार दिउँसो १:३८ बजे अहमदाबादको सरदार वल्लभभाई पटेल अन्तर्राष्ट्रिय विमानस्थलबाट लन्डनका लागि उडेको थियो। तर उडान भरेको मात्र दुई मिनेटपछि, १:४० बजे, विमान मेघानीनगर नजिकै दुर्घटनामा परेको हो।
२४२ जना सवार, पूर्व मुख्यमन्त्री पनि यात्रुमा
विमानमा दुई पाइलटसहित १२ जना चालक दलका सदस्यहरू र २३० यात्रुहरू गरी कुल २४२ जना सवार थिए। स्रोतका अनुसार, गुजरातका पूर्व मुख्यमन्त्री तथा वरिष्ठ भाजपा नेता विजय रुपानी पनि सोही विमानमा सवार थिए।
दमकल र उद्धार टोली सक्रिय
दुर्घटनापछि घटनास्थलमा ७ वटा दमकलका गाडी पठाइएका छन् र आगो निभाउने प्रयास जारी छ। बीएसएफ र एनडीआरएफका टोलीहरू पनि घटनास्थलमा सक्रिय छन्। एनडीआरएफले गान्धीनगरबाट तीन टोली र बडोदराबाट थप तीन टोली खटाएको जनाएको छ।
धुवाँले आकाश ढाकियो
धारपुरदेखि मेघानीनगरसम्म आकाशमा बाक्लो धुवाँ देखिएको स्थानीयहरूले बताएका छन्। सामाजिक सञ्जालहरूमा विमान दुर्घटनाका थुप्रै भिडियोहरू भाइरल भएका छन्, जसमा कालो धुवाँको विशाल मुस्लो देखिन्छ।
दुर्घटनाको कारण अज्ञात
हालसम्म दुर्घटनाको कारण पुष्टि भइसकेको छैन। अधिकारीहरूले अनुसन्धान सुरु गरिसकेका छन्। अग्नि नियन्त्रक जयेश खाडियाले विमानमा आगो लागेको र नियन्त्रणमा लिन दमकल खटाइएको जानकारी दिएका छन्।
