काठमाडौँ: नेकपा (एकीकृत समाजवादी) ले अध्यक्ष माधवकुमार नेपालविरुद्ध दायर भ्रष्टाचार मुद्दामा प्रतिरक्षा गर्न कार्यदल गठन
नेपाल कम्युनिष्ट पार्टी (एकीकृत समाजवादी) ले पार्टी अध्यक्ष एवं पूर्वप्रधानमन्त्री माधवकुमार नेपालविरुद्ध दायर भ्रष्टाचार मुद्दामा कानुनी प्रतिरक्षा गर्न कार्यदल गठन गरेको छ।
अधिवक्ता परिवर्तन राईको संयोजकत्वमा गठित उक्त कार्यदलमा अधिवक्ता गजबहादुर ऐरी, दुर्गाप्रसाद चिमरिया र कपिलदेव ढकाल सदस्य रहेका छन्।
केन्द्रीय कानुन विभागका प्रमुख डा. देउमान सम्वाहाङ्फेका अनुसार कार्यदलले आवश्यक कागजात अध्ययन गरी विशेष अदालतमा पार्टी संगठनको तर्फबाट कानुनी प्रतिरक्षा प्रस्तुत गर्नेछ।
विभागले कानुनी शासनप्रति प्रतिबद्ध रही, राजनीतिक उद्देश्यले प्रेरित गलत आरोपहरू जनतामाझ स्पष्ट पार्ने जनाएको छ।
अख्तियार दुरूपयोग अनुसन्धान आयोगले जेठ २२ गते अध्यक्ष नेपालसहित ९३ जनालाई दोषी ठहर गर्दै १८ करोड रुपैयाँभन्दा बढी बिगो दाबी गर्दै विशेष अदालतमा मुद्दा दायर गरेको थियो।
