काठमाडौं: आईसीसी विश्वकप लिग–२ अन्तर्गत जारी त्रिकोणात्मक सिरिजमा नेपालले आज पुनः स्कटल्याण्डसँग प्रतिस्पर्धा गर्न लागेको छ। स्कटल्याण्डको फोर्टहिल, डुन्डी मैदानमा हुने खेल नेपाली समयअनुसार दिउँसो ३:४५ बजे सुरु हुनेछ।
नेपालले यसअघि स्कटल्याण्डविरुद्धको पहिलो खेलमा १ विकेटको रोमाञ्चक जित निकालेको थियो। त्यसपछि नेदरल्याण्डविरुद्धको दोस्रो खेलमा ५ विकेटको जित हात पार्दै नेपालले सिरिजमा अपराजित यात्रा कायम राखेको छ।
नेपालले सिरिजको अन्तिम खेल आगामी बिहीबार नेदरल्याण्डसँग खेल्नेछ।
अंकतालिका अवस्था
हालसम्म नेपालले लिग–२ अन्तर्गत १४ खेलमा १० अंक जोडेको छ र सातौं स्थानमा रहेको छ। १६ खेल खेलेको युएई ६ अंकसहित पुछारमा छ।
अर्कोतर्फ, शीर्ष स्थानमा रहेको अमेरिकाले २० खेलबाट २८ अंक जोडेको छ।
नेपाल आजको खेलमा विजयी भई अंकतालिकामा उक्लिने र आगामी चरणको सम्भावनालाई बलियो बनाउने लक्ष्य लिएर मैदान उत्रनेछ।
