बाजुरा, २५ जेठ: बाजुराको बुढीगङ्गा नगरपालिकाले बाम्का बजारमा भएको भीषण आगलागीका पीडितहरूलाई राहत तथा पुनःस्थापना गर्न एकद्वार प्रणाली अपनाउने निर्णय गरेको छ।
गएको शुक्रबार नवदुर्गा होटलमा खाना पकाउने ग्यास सिलिण्डर चुहिएर आगलागी हुँदा ३१ पसल पूर्ण रूपमा र ७ पसल आंशिक रूपमा क्षति भएको प्रारम्भिक अनुमान गरिएको छ। करीब रु १५ करोडभन्दा बढीको क्षति भएको बताइएको छ, जसले बजार क्षेत्रलाई नै ध्वस्त बनाएको छ।
राहत समिति गठन
राहत वितरण प्रक्रिया व्यवस्थित बनाउन बुढीगङ्गा नगरपालिकाका नगरप्रमुख रामबहादुर बानियाँको संयोजकत्वमा ११ सदस्यीय समिति गठन गरिएको छ।
शनिबार सम्पन्न बुढीगङ्गा नगरपालिका र त्रिवेणी नगरपालिकाको संयुक्त बैठकले उक्त निर्णय गरेको हो। समितिमा त्रिवेणी नगरप्रमुख कर्णबहादुर थापा, उपप्रमुख कमला जैशी (न्यौपान), बुढीगङ्गा उपप्रमुख माया खड्का (कँुवर) लगायतको सहभागिता रहेको छ।
बैठकले पीडितहरूलाई उचित राहत र पुनःस्थापनाका लागि स्थानीय, प्रदेश र संघ सरकारसँगै विभिन्न संघसंस्थालाई पनि सहयोगका लागि आह्वान गर्ने निर्णय गरेको त्रिवेणी नगरप्रमुख थापाले जानकारी दिनुभयो।
रु एक लाख राहत सहयोग
आगलागीपीडितको राहत व्यवस्थापनमा सहयोग पु-याउने उद्देश्यले बुढीनन्दा नगरपालिकाले रु एक लाख सहयोग गरेको छ। नगरप्रमुख बोहराले उक्त रकम राहत समिति संयोजक बानियाँलाई हस्तान्तरण गर्नुभएको हो।
नगरप्रमुख बोहराले विपत्तिको बेलामा सबै स्थानीय तहको सहकार्य आवश्यक रहेको उल्लेख गर्दै सामूहिक प्रयासमार्फत पीडितको पुनःस्थापना सुनिश्चित गर्नुपर्नेमा जोड दिनुभयो।
