कर्णाली, २३ जेठ: उच्च अदालत सुर्खेतले चालु आर्थिक वर्ष २०८१/८२ को जेठ तेस्रो सातासम्म करिब ७९ प्रतिशत मुद्दा फर्छ्योट गरेको जनाएको छ। बिहीबार वीरेन्द्रनगरमा आयोजित ‘अदालतको काम कारबाहीका सम्बन्धमा पत्रकारसँग अन्तरक्रिया’ कार्यक्रममा अदालतका न्यायाधीश मातृकाप्रसाद भण्डारीले सो जानकारी दिनुभयो।
उहाँका अनुसार, गत वर्षदेखि सरिएका १६२ र चालु वर्षमा दर्ता भएका ६१३ मुद्दा गरी कुल ७७५ मुद्दामध्ये ६०९ मुद्दा (७८.५८%) फर्छ्योट भइसकेका छन्। बाँकी १६६ मुद्दा फर्छ्योट हुन बाँकी छन्। आर्थिक वर्षको अन्त्यसम्म ८५ प्रतिशत मुद्दा फर्छ्योट गर्ने लक्ष्य अदालतले राखेको छ।
फर्छ्योटको विस्तृत विवरण
न्यायाधीश भण्डारीले दिएको विवरण अनुसार पुनरावेदन अदालतमा दर्ता भएका:
देवानी मुद्दा: ८५
सरकारवादी फौजदारी: ५४१
दुनियावादी फौजदारी: ४४
रिट निवेदन: ९४
सुरु मुद्दा: ११
जम्मा ७७५ मुद्दामध्ये ६०९ फर्छ्योट भइसकेको छ।
त्यस्तै, मुलुकी फौजदारी कार्यविधि संहिताको दफा ७३ अनुसार १३५ मुद्दा र मुलुकी देवानी कार्यविधि संहिताको दफा १५७ अनुसार १७ मुद्दा गरी १५२ मुद्दामध्ये १२९ फर्छ्योट भएको छ भने २३ मुद्दा बाँकी छन्।
प्रमुख मुद्दा वर्गीकरण
दर्ता भएका मुद्दाहरूमा:
जबर्जस्ती करणी: १३१
ज्यान मार्ने: १०८
लागुऔषध सम्बन्धी: ७३
विवाहसम्बन्धी: ६१
चोरी: ४५
वन तथा वन्यजन्तु: १७
जातीय छुवाछूत: ३१
हातहतियार खरखजना: ६
मानव बेचबिखन तथा ओसारपसार: ५
रिट निवेदन: ९४
अन्य मुद्दाहरू: २०४
आगामी लक्ष्य र पत्रकारसँगको आग्रह
कार्यक्रममा कायममुकायम मुख्य न्यायाधीश कृष्णलाल भट्टराईले चालु आर्थिक वर्षमा एक हजार मुद्दा दर्ता हुने र ७१२ मुद्दा फर्छ्योट गर्ने लक्ष्य रहेको जानकारी दिनुभयो। उहाँले कर्णाली प्रदेशमा न्यायालयको कामकारबाहीबारे कम समाचार प्रसारण हुने बताएर पत्रकारहरूलाई गहिरो अध्ययन र अनुसन्धानमा आधारित न्यायसम्बन्धी समाचार सम्प्रेषण गर्न आग्रह गर्नुभयो।
उहाँले अदालत संविधान र कानुनबाट मात्र निर्देशित हुने भन्दै, कुनै भीड, दबाब वा बाह्य प्रभावले अदालतलाई प्रभावित गर्न नसक्ने स्पष्ट पार्नुभयो।
