काठमाडौँ: नेपाल कम्युनिष्ट पार्टी (एकीकृत समाजवादी) को पदाधिकारी बैठकले अध्यक्ष माधवकुमार नेपालविरुद्ध अख्तियार दुरुपयोग अनुसन्धान आयोगले दायर गरेको मुद्दाको कानुनी रूपमा प्रतिवाद गर्ने निर्णय गरेको छ।
पार्टी अध्यक्ष नेपालकै अध्यक्षतामा केन्द्रीय कार्यालयमा आज बसेको पदाधिकारी बैठकले पतञ्जली जग्गा प्रकरण मन्त्रिपरिषद्को नीतिगत निर्णयअन्तर्गत पर्ने बताउँदै आयोगको कदमप्रति असहमति जनाएको हो। बैठकले पार्टी सत्यको पक्षमा दृढ भएर अघि बढ्ने प्रतिबद्धता व्यक्त गरेको छ।
बैठकले, विगतदेखि पार्टीलाई कमजोर पार्ने र नेताहरूमाथि राजनीतिक प्रतिशोधस्वरूप कारबाही गर्न खोजिएको भन्दै, आम कार्यकर्ता र समर्थकहरूलाई नआत्तिन र एकढिक्का रहन आग्रह गरेको छ।
“उक्त मुद्दा पूर्ण रूपमा षड्यन्त्रपूर्ण छ,” भन्दै बैठकले कानुनी उपचारको बाटोबाट सत्य उजागर गरिने र पार्टी पङ्क्तिमा एकता कायम राखिने स्पष्ट पारेको छ। यो जानकारी पार्टी केन्द्रीय प्रचार विभागका उपप्रमुख दामोदर अर्यालले दिनुभयो।
अख्तियारले पतञ्जली समूहसँग सम्बन्धित जग्गा सट्टापट्टा प्रकरणमा रु १८ करोडभन्दा बढीको बिगो दाबी गर्दै अध्यक्ष नेपालसहित अन्य विरुद्ध विशेष अदालतमा मुद्दा दायर गरेको हो। यसै सन्दर्भमा, पार्टीले कानुनी रणनीति तय गर्न अधिवक्ता तथा कानुनविद्हरूसँग परामर्श सुरु गरिसकेको जनाएको छ।
