काठमाडौँ: हाल देशभर पश्चिमी वायु र स्थानीय वायुसँगै बंगालको खाडी र अरबसागरबाट प्रवेश गरेको जलवाष्पयुक्त हावाको आंशिक प्रभाव देखिएको मौसम पूर्वानुमान महाशाखाले जनाएको छ।
महाशाखाका अनुसार आज दिउँसो देशका पहाडी भूभागमा आंशिकदेखि सामान्य बदली रहनेछ भने तराई तथा अन्य भूभागमा मौसम सामान्यतया सफा रहनेछ। पहाडी तथा हिमाली क्षेत्रमा केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। यस्तै, हिमाली क्षेत्रका केही स्थानमा हल्का हिमपात पनि हुनसक्ने अनुमान गरिएको छ।
आज राति पनि पहाडी क्षेत्रमा आंशिक बदली रहनेछ भने अन्यत्र मौसम सफा रहनेछ। पहाडी क्षेत्रका एक-दुई स्थानमा मेघगर्जन र चट्याङसहित हल्कादेखि मध्यम वर्षा र हिमाली क्षेत्रमा हल्का हिमपातको सम्भावना रहेको महाशाखाले जनाएको छ।
