काठमाडौं: हाल देशमा पश्चिमी वायु, स्थानीय वायु र बंगालको खाडीबाट प्रवेश गरेको जलवाष्पयुक्त हावाको आंशिक प्रभाव देखिएको छ। यसको असरले देशका विभिन्न भागमा वर्षा र हिमपातको सम्भावना देखिएको जल तथा मौसम विज्ञान विभागले जनाएको छ।
मौसम पूर्वानुमान महाशाखाका अनुसार देशका पहाडी भू-भागमा सामान्य बदली छ भने अन्य भागमा मौसम मुख्यतः सफा वा आंशिक बदली छ। सुदूरपश्चिम र कर्णाली प्रदेशका पहाडी क्षेत्रका केही स्थानमा मेघगर्जन र चट्याङसहित हल्का वर्षा भइरहेको छ।
दिउँसोको मौसम
दिउँसो देशभर आंशिकदेखि सामान्य बदली रहनेछ। कोशी प्रदेश लगायत पहाडी क्षेत्रमा थोरै स्थानमा र बाँकी भू-भागका एक–दुई स्थानमा मेघगर्जन, चट्याङसहित हल्कादेखि मध्यम वर्षाको सम्भावना छ। हिमाली क्षेत्रमा हल्का वर्षा र हिमपात पनि हुन सक्ने महाशाखाले जनाएको छ।
रातिको मौसम
राति पनि पहाडी भू-भागमा आंशिकदेखि सामान्य बदली रहनेछ भने अन्य भागमा मौसम मुख्यतः सफा वा आंशिक बदली रहनेछ। कोशी, बागमती, गण्डकी र कर्णाली प्रदेशका पहाडी भागमा मेघगर्जन र चट्याङसहित हल्का वर्षा हुन सक्छ। कोशी, गण्डकी र कर्णाली प्रदेशका हिमाली क्षेत्रका केही स्थानमा हल्का हिमपातको सम्भावना पनि छ।
सावधानी अपनाउन आग्रह
महाशाखाले मौसमका कारण दैनिक जनजीवन, कृषि, स्वास्थ्य, सडक तथा हवाई यातायात प्रभावित हुन सक्ने भन्दै आवश्यक सतर्कता अपनाउन अनुरोध गरेको छ।
