पोखरा: गण्डकी प्रदेश — नेपाली कांग्रेस कास्कीले समग्र जिल्ला र विशेषगरी पोखराको समुन्नति र विकासका लागि विभिन्न क्षेत्रका विज्ञ, सरोकारवाला निकाय तथा नागरिकहरूसँग सुझाव संकलन प्रक्रिया सुरु गरेको छ।
तीन तहका सरकारहरू आगामी आर्थिक वर्षको नीति, कार्यक्रम र बजेट निर्माणको तयारीमा जुटिरहेका बेला कांग्रेसले स्थानीय आवश्यकतालाई प्रभावकारी ढंगले बजेट तथा कार्यक्रममा समेटाउन सुझाव लिने पहल गरेको हो।
कांग्रेस कास्कीका सभापति किशोरदत्त बरालका अनुसार पार्टीले वडा कार्यसमितिका सभापति, महासमिति सदस्य र महाधिवेशन प्रतिनिधिसँग छलफल गरी प्रारम्भिक सुझाव संकलन गरिसकेको छ। अब पर्यटन, उद्योग र व्यवसाय क्षेत्रका प्रतिनिधिसँग समेत परामर्श गर्ने तयारी भइरहेको उहाँले जानकारी दिनुभयो।
कांग्रेस कास्कीका सहसचिव एवं प्रवक्ता नवीन सिग्देलका अनुसार, “छलफलबाट स्थानीय आवश्यकता र जनताको प्राथमिकता पहिचान गरेर त्यसको आधारमा नीति निर्माणमा प्रभाव पार्ने रणनीति तय गरिनेछ। भौतिक पूर्वाधार, सेवा प्रवाह र जनजीविकासँग सम्बन्धित विषयमा तीनै तहका सरकारसँग समन्वय गरी कार्यान्वयनमा लैजाने पहल हुनेछ।”
