काठमाडौं: आज १३६औँ अन्तर्राष्ट्रिय श्रमिक दिवस (मे दिवस) नेपालसहित विश्वभर विविध कार्यक्रमसहित मनाइँदैछ। श्रमिकको पेसागत सम्मान, मर्यादा र अधिकारको प्रत्याभूति गराउने उद्देश्यले हरेक वर्ष मे १ तारिखमा यो दिवस मनाइने गरिन्छ।
‘आठ घण्टा काम, आठ घण्टा मनोरञ्जन र आठ घण्टा आराम’ भन्ने नारासहित सन् १८८६ मे १ मा अमेरिकाको सिकागोमा सुरु भएको मजदुर आन्दोलनको स्मरणमा मे दिवस मनाउने परम्परा रहिआएको हो। सो आन्दोलनका क्रममा हेय मार्केट क्षेत्रमा भएको बम विस्फोट र प्रहरीले चलाएको गोलीबाट सात जना मजदुरको ज्यान गएको थियो। आन्दोलनले श्रमिक अधिकारको स्थापना गर्दै अन्ततः सफलता हासिल गरेको थियो।
सन् १८८९ मा फ्रान्सको पेरिसमा सम्पन्न श्रमिक नेताहरूको बैठकले मे १ लाई अन्तरराष्ट्रिय श्रमिक दिवसका रूपमा विश्वभर मनाउने निर्णय गरेको थियो।
नेपालमा विसं २००३ मा विराटनगरमा भएको श्रमिक आन्दोलन र २००७ सालको राजनीतिक परिवर्तनसँगै श्रमिक दिवस मनाउने परम्परा सुरु भएको हो। विसं २०१९ मा नेपाल मजदुर सङ्गठनले पहिलोपटक औपचारिक रूपमा मे दिवस मनाएको र २०४६ सालको राजनीतिक परिवर्तनपछि सार्वजनिक बिदा दिन थालिएको नेपाल ट्रेड युनियन महासङ्घले जनाएको छ।
यस वर्ष पनि विभिन्न श्रमिक संगठनहरूले र्याली, सभालगायत विविध कार्यक्रममार्फत दिवस मनाइरहेका छन्।
