सोलुखुम्बु: विश्वको सर्वोच्च शिखर सगरमाथा क्षेत्र अहिले पर्यटकले खचाखच भरिएको छ। सोमबार मात्रै करिब ७ सय पर्यटक खुम्बु प्रवेश गरेको सगरमाथा राष्ट्रिय निकुञ्ज कार्यालय, नाम्चेले जनाएको छ।
निकुञ्जका रेञ्जर विवेक श्रेष्ठका अनुसार सोमबार ६९४ जना पर्यटक खुम्बु क्षेत्रमा प्रवेश गरेका थिए। तीमध्ये ६०८ जना विदेशी र ८६ जना नेपाली रहेका छन्। श्रेष्ठका अनुसार नाम्चेमा मात्र ६५२ विदेशी र १५१ जना नेपाली पर्यटक पुगेका थिए।
सगरमाथा आरोही तेम्बाछिरी शेर्पाका अनुसार वसन्त ऋतुमा पर्यटकको चाप बढेसँगै खुम्बु क्षेत्रमा होटल पाउनसमेत मुस्किल हुन थालेको छ। मौसम अनुकूल हुँदै गएपछि लुक्लाबाट दैनिक हवाई उडान पनि बढेको र त्यसले गर्दा पर्यटकको आगमन उल्लेख्य रुपमा बढेको तारा एयर लुक्लाका इन्चार्ज अमृत मगरले बताए।
“लुक्लाको मौसम अनुकूल भएकाले हवाई उडान बढाइएको छ,” उनले भने, “त्यसको प्रत्यक्ष प्रभावस्वरूप आन्तरिक र बाह्य पर्यटकको चहलपहल बढेको छ, जसले होटलहरू अघिल्लो नै बुक हुन थालेका छन्।”
ट्रेकिङ एजेन्सीज् एसोसिएसन अफ नेपाल (टान) का वरिष्ठ उपाध्यक्ष कर्मा शेर्पाले कोभिडपछि सुस्त बनेको पर्यटन व्यवसाय पुनः सक्रिय हुँदै गएको र यसले स्थानीयको आम्दानी र रोजगारीमा समेत सकारात्मक प्रभाव पारेको बताए।
उनका अनुसार लुक्ला, नाम्चे लगायतका क्षेत्रमा रहेका अधिकांश होटलहरू अहिले पर्यटकले भरिएका छन्। यहाँ आएका पर्यटकको ठूलो संख्याले सगरमाथा राष्ट्रिय निकुञ्ज क्षेत्रको भ्रमण गर्ने गरेको बताइएको छ।
निकुञ्ज कार्यालयका अनुसार सार्क मुलुकका पर्यटकबाट प्रतिव्यक्ति रु १,५००, अन्य देशका पर्यटकबाट रु ३,००० र नेपाली नागरिकबाट रु १०० प्रवेश शुल्क लिने गरिन्छ। प्रमुख संरक्षण अधिकृत सुस्मा रानाका अनुसार यसरी संकलित राजस्वले देशको अर्थतन्त्रमा सहयोग पुर्याइरहेको छ।
उनले जानकारी दिएअनुसार अधिकांश पर्यटक काठमाडौँ वा रामेछापको मन्थली विमानस्थल हुँदै लुक्ला पुग्ने गर्छन्, र त्यहाँबाट नाम्चे, ट्याङबोचे, फेरुचे हुँदै सगरमाथाको आधार शिविरतर्फ यात्रा गर्छन्।
