फुङ्लिङ (ताप्लेजुङ): ताप्लेजुङको फुङ्लिङबाट पाथीभरा मन्दिर दर्शनका लागि गइरहेको एक बलेरो गाडीमा आगलागी हुँदा चार जना यात्रुको मृत्यु भएको छ भने दुई जना घाइते भएका छन्।
जिल्ला प्रहरी कार्यालय ताप्लेजुङका अनुसार मे १ च ३०११ नम्बरको बलेरो गाडी फुङ्लिङ नगरपालिका–१० स्थित सेवारोचोकमा आइपुग्दा एक्कासि आगलागी भएको थियो। आगलागीमा जलेर मृत्यु भएका चार जनाको पहिचान खुल्न बाँकी रहेको जिल्ला प्रहरी कार्यालयका सूचना अधिकारी विवेक बस्नेतले जानकारी दिनुभयो।
विद्युत् तारको कारण आगलागी
आज बिहान करिब ५ः०० बजे घटनास्थल नजिकैको विद्युत् पोलबाट चुँडिएको तार सडकमा झरेको र उक्त तारमा गाडी अल्झिँदा अचानक आगलागी भएको प्रारम्भिक अनुसन्धानमा देखिएको प्रहरीले जनाएको छ।
घटनाको जानकारी प्राप्त हुनासाथ प्रहरी निरीक्षक रवि रावलको कमाण्डमा १५ जनाको टोली तुरुन्तै घटनास्थलमा खटिएको थियो।
उद्धार र अनुसन्धान
घाइतेहरूलाई तत्काल उद्धार गरी जिल्ला अस्पताल ताप्लेजुङ पठाइएको छ। यद्यपि उनीहरूको अवस्था कस्तो छ भन्ने विस्तृत विवरण आइसकेको छैन। आगो पूर्णरूपमा नियन्त्रणमा ल्याइएको प्रहरीले जनाएको छ।
घटनाबारे थप विस्तृत अनुसन्धान जारी रहेको जिल्ला प्रहरी कार्यालयले जनाएको छ।
