वीरगञ्ज, पर्सा: जिल्ला प्रशासन कार्यालय पर्साले वीरगञ्ज महानगर क्षेत्रमा लागू गरिएको निषेधाज्ञा आज बिहान ७ बजेदेखि हटाउने निर्णय गरेको छ।
पर्साका प्रमुख जिल्ला अधिकारी गणेश अर्यालको अध्यक्षतामा बिहीबार बसेको जिल्ला सुरक्षा समितिको बैठकले क्षेत्रको शान्ति सुरक्षाको अवस्था सामान्य भइसकेको निष्कर्ष निकाल्दै निषेधाज्ञा हटाउने निर्णय गरेको हो।
प्रजिअ अर्यालले गत वैशाख १ गतेदेखि लागू गरिएको निषेधाज्ञा हटाउने निर्णय शान्ति सुरक्षाको समग्र अवस्था हेरेर गरिएको जानकारी दिए।
यस्तै, पर्साका प्रहरी उपरीक्षक गौतम मिश्रले बुधबार दिउँसोदेखि वीरगञ्जको अवस्था सामान्य हुँदै गइरहेको बताए।
