दमौली (तनहुँ): मुग्लिन–पोखरा सडक विस्तारअन्तर्गत दमौली बजार क्षेत्रमा तीव्र गतिमा कालोपत्रको काम भइरहेको छ।
व्यास नगरपालिका–२ अन्तर्गत बागबजार, मुख्यचोक, सफासडक चोक हुँदै तरकारी लाइनसम्म कालोपत्रको काम जारी रहेको मुग्लिन–पोखरा सडक आयोजनाको पूर्वी खण्डका इञ्जिनियर विष्णुप्रसाद पाण्डेले राससलाई जानकारी दिनुभयो।
उनका अनुसार चालु आर्थिक वर्षभित्रै दमौली खण्डको कालोपत्र कार्य पूरा गर्ने लक्ष्यसहित काम भइरहेको छ। बुधबार बागबजार खण्डमा कालोपत्र गरिएको थियो भने बिहीबार मुख्यचोक क्षेत्रमा एकतर्फी कालोपत्र सम्पन्न भएको छ। दुर्गामन्दिरदेखि चापाघाटसम्मको खण्डमा पनि चाँडै कालोपत्र गरिनेछ।
पूर्वी खण्डका अन्य स्थानमा घरटहरा हटाउन ढिलाइ भएका कारण कालोपत्रको काम केही समय रोकिएको थियो। हाल चार किलोमिटर सडक मात्रै कालोपत्र गर्न बाँकी रहेको इञ्जिनियर पाण्डेले जानकारी दिनुभयो।
पूर्वी खण्डअन्तर्गत हालसम्म सडक निर्माणको ८२.९५ प्रतिशत काम सम्पन्न भइसकेको छ। यो खण्डमा पहिलो तहअन्तर्गत ३८.३१ किलोमिटर दूरीमा चार लेन तथा ०.२९ किलोमिटर दूरीमा दुई लेनको कालोपत्र गरिएको छ।
