काठमाडौं: राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले वैशाख ७ गते निषेधित क्षेत्रमै प्रदर्शन गर्ने चेतावनी दिएका छन्।
बिहीबार बसेको राप्रपा केन्द्रीय कार्यसम्पादन समितिको बैठकपछि सञ्चारकर्मीसँग कुरा गर्दै अध्यक्ष लिङ्देनले उक्त चेतावनी दिएका हुन्। बैठकले वैशाख ९ गते देशभरका ७७ वटै जिल्लामा विरोधसभा, धर्ना र प्रदर्शन गर्ने निर्णयसमेत गरेको छ।
उपत्यकाभर राप्रपाका नेताहरू वडास्तरसम्म पुग्ने र सङ्गठनलाई बलियो बनाउँदै आन्दोलनलाई केन्द्रित गर्ने निर्णय भएको लिङ्देनले बताए। “सरकार नागरिकका मौलिक अधिकारमा हस्तक्षेप गर्दैछ,” उनले भने, “त्यसको विरोधमा निषेधित क्षेत्रमा प्रदर्शन गर्ने निर्णय गरेका छौं।”
वैशाख ७ गतेको कार्यक्रम सभा नभई प्रदर्शनका रूपमा अघि बढाइने पनि उनले प्रष्ट पारे।
बैठकले राप्रपाका नेता रविन्द्र मिश्र र डा. धवलशम्शेर राणाको निशर्त रिहाइका लागि कानुनी र राजनीतिक संघर्ष अघि बढाउने निर्णयसमेत गरेको छ। साथै, वैशाख २० गतेभित्र उनीहरूलाई रिहा नगरिए आन्दोलन अझ चर्काउने चेतावनी पनि दिइएको छ।
