दोधारा चाँदनी (कञ्चनपुर): पश्चिमी सीमानाका गड्डाचौकी हुँदै नेपाल भित्रिने विदेशी पर्यटकको सङ्ख्या क्रमशः बढ्दै गएको छ।
अध्यागमन कार्यालय गड्डाचौकीका प्रमुख कृष्णानन्द जोशीका अनुसार, कोभिड–१९ महामारीपछि यो नाका हुँदै नेपाल आउने पर्यटकको संख्या घटेको भए पनि पछिल्ला दुई वर्षयता पुनः वृद्धि भएको छ। “अहिले यहाँबाट विदेशी पर्यटकको आगमनमा उल्लेखनीय वृद्धि देखिएको छ,” उहाँले भन्नुभयो, “यस वर्ष अझै बढी पर्यटक आउने अपेक्षा गरेका छौँ।”
उनका अनुसार सन् २०२३ मा गड्डाचौकी नाका हुँदै ९८३ जना विदेशी पर्यटक नेपाल भित्रिएका थिए। सन् २०२४ मा यो संख्या बढेर १,१५४ पुगेको छ। सन् २०२५ को हालसम्म (मार्चसम्म) ४५९ जना विदेशी पर्यटक नेपाल प्रवेश गरिसकेका छन्, जसमध्ये केवल मार्च महिनामा मात्रै २८९ जना आएका छन्।
गड्डाचौकी हुँदै नेपाल भित्रिने अधिकांश पर्यटकहरू पोखरा, बर्दिया, चितवन, लुम्बिनी लगायतका पर्यटकीय गन्तव्यतर्फ जाने गरेका छन्। यो नाकाबाट विशेषगरी फ्रान्स, इटाली, स्पेन, दक्षिण कोरिया, जर्मनी, अष्ट्रेलिया, रुस, बेलायत, अमेरिका, अर्जेन्टिनालगायत देशका नागरिकहरू नेपाल आउने गरेका छन्।
