काठमाडौं: अमेरिकी राष्ट्रपति डोनाल्ड ट्रम्पले सोमबार चीनमाथि थप आयात कर लगाउने चेतावनी दिएपछि चीनको कडा प्रतिक्रिया आएको छ। चीनको वाणिज्य मन्त्रालयले ट्रम्पको भनाइलाई “अर्को ठूलो गल्ती” भन्दै आलोचना गरेको छ।
मन्त्रालयले जारी गरेको विज्ञप्तिमा भनिएको छ, “अमेरिकाबाट आउने कुनै पनि प्रकारको धम्कीपूर्ण व्यवहारलाई हामी स्वीकार गर्नेछैनौं। चीन अन्तिमसम्म करहरूको विरोधमा सम्पूर्ण शक्ति प्रयोग गर्दै लड्नेछ।”
चीनको सत्तारूढ कम्युनिस्ट पार्टीको मुखपत्र पिपल्स डेली मा यस विषयमा प्रकाशित एक लेखमा चीनको प्रतिक्रिया “उचित, कानुनी, बलियो र संयमित” भएको उल्लेख छ। लेखले अमेरिकाको व्यवहारलाई शक्ति प्रदर्शनको प्रयासको रूपमा चित्रित गर्दै भनिएको छ, “दबाब र धम्कीमार्फत चीनलाई झुक्याउनु वा रोक्नु सम्भव छैन।”
“दबाब र धम्कीमार्फत चीनलाई सम्हाल्नु सही तरिका होइन” शीर्षकमा प्रकाशित उक्त लेखमा ट्रम्प प्रशासनको आलोचना गर्दै भनिएको छ, “अमेरिका कर प्रणालीलाई हतियारका रूपमा प्रयोग गर्दैछ, जबकि चीनले अन्तर्राष्ट्रिय सहकार्य र समानतामा विश्वास राख्छ।”
चीन–अमेरिका व्यापार युद्ध फेरि चर्किन सक्ने संकेत देखिन थालेको छ, जसले विश्वव्यापी बजारमा पनि प्रभाव पार्न सक्ने अड्कल गर्न थालिएको छ।
