काठमाडौं: देशमा हाल पश्चिमी वायु र स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ। यस कारण देशका पहाडी भूभागमा आंशिक बदली रहँदा बाँकी भूभागमा मौसम मुख्यतया सफा रहेको छ।
महाशाखाका अनुसार आज दिउँसो पनि देशका पहाडी क्षेत्रमा आंशिक बदली रहनेछ भने बाँकी स्थानमा आंशिक बदलीदेखि मौसम सामान्यतया सफा रहनेछ। कोशी, बागमती र गण्डकी प्रदेशका पहाडी भूभागका एक–दुई स्थानमा मेघगर्जन र चट्याङसहित हल्का वर्षा हुने सम्भावना छ।
त्यस्तै, ती प्रदेशका हिमाली क्षेत्रका केही स्थानहरूमा हल्का वर्षा वा हिमपातको पनि सम्भावना रहेको छ।
रातिको समयसम्म देशभर आंशिक बदलीदेखि मुख्यतया सफा मौसम रहने पूर्वानुमान गरिएको छ।
देशका धेरै स्थानमा हाल वर्षाको सम्भावना न्यून रहेकाले सुख्खापन, आगलागी र वायू प्रदूषण बढ्न सक्ने अनुमान गरिएको छ। यसले स्वास्थ्य, दैनिक जनजीवन, कृषि, सडक तथा हवाई यातायातमा असर पार्न सक्ने भएकाले आवश्यक सतर्कता अपनाउन महाशाखाले आग्रह गरेको छ।
