काठमाडौं: दक्षिण भारतीय अभिनेता बेल्लमकोन्डा साई श्रीनिवासले नेपाल र नेपालीको सौन्दर्य, सत्कार र संस्कृतिप्रति गहिरो प्रशंसा व्यक्त गरेका छन्।
दक्षिण भारतीय चलचित्र ‘टाइसन नाइडु’ को छायाङ्कनका लागि नेपाल आएका अभिनेता श्रीनिवासले चन्द्रागिरीमा सञ्चारकर्मीसँगको संक्षिप्त कुराकानीमा भने, “नेपाल आउन चाहेर पनि आउन पाएको थिइनँ। तर कामको सिलसिलामा आएको यो पहिलो भ्रमणमा पाएको मायाले मलाई मुग्ध बनाएको छ।”
उनका अनुसार चलचित्रको कथा नेपालसँग जोडिएकाले यहीं आएर छायाङ्कन गर्ने निर्णय गरिएको हो। “यस फिल्ममार्फत नेपाली कलाकार र दक्षिण भारतीय फिल्म उद्योगबीचको सहकार्य अझै मजबुत हुनेछ,” श्रीनिवासले बताए।
द्वन्द्वप्रधान यस चलचित्रका लागि पोखराबाट सुरु गरिएको छायाङ्कन हाल काठमाडौंमा भइरहेको छ। अभिनेता श्रीनिवासले नेपाली खानाको समेत प्रशंसा गर्दै, “यहाँका परिकारले मलाई लोभ्याएको छ। सगरमाथा हेर्न मन छ तर यो पटक सम्भव हुने जस्तो छैन। तर पशुपतिनाथको दर्शन गरेर फर्कने योजना छ,” भने।
सन् २०१४ मा तेलुगु चलचित्र ‘अल्लुडु सीनु’ बाट अभिनय यात्रा सुरु गरेका श्रीनिवासले अहिलेसम्म १० चलचित्रमा अभिनय गरिसकेका छन्। हाल ‘टाइसन नाइडु’ सहित उनका तीन फिल्महरू छायाङ्कनको क्रममा छन्।
उक्त चलचित्रमा नेपाल प्रहरीको भूमिकामा देखिन लागेका नेपाली अभिनेता किरण श्रेष्ठले दक्षिण भारतीय फिल्ममा काम गर्ने अनुभव नयाँ र रोमाञ्चक रहेको बताए। “अघिल्लोपटक उत्तर भारतीय वेब शृङ्खलामा काम गरेको थिएँ। तर दक्षिण भारतीय टोलीसँगको काम अझै व्यावसायिक, सुव्यवस्थित र भव्य देखिएको छ,” श्रेष्ठले भने।
श्रेष्ठ ‘IC 814’ नामक भारतीय वेब सिरिजमा पनि काम गरिसकेका छन्। ‘टाइसन नाइडु’ को छायाङ्कन विगत एक वर्षदेखि भारतमा विभिन्न तालिकामा हुँदै आएको हो। कथा नेपालसँग जोडिएको हुनाले केही दृश्यहरू नेपालमा खिचिन लागेका हुन्। कलाकार तथा टोलीको नेपाल बसाइबारे भने निर्माण पक्षले औपचारिक जानकारी दिएको छैन।
