धनुषा: मधेस प्रदेशका मुख्यमन्त्री सतिशकुमार सिंहले धनुषाको मिथिला नगरपालिका–४ स्थित जलाद खोलाको शनिबार अनुगमन गर्नुभएको छ। अनुगमनका क्रममा खोलाबाट अवैध रूपमा नदीजन्य पदार्थ (ढुंगा, गिट्टी, बालुवा) को उत्खनन भइरहेको पाइएपछि उत्खनन तथा ओसारपसारमा प्रयोग भएका सातवटा टिपर र दुईवटा स्काभेटर नियन्त्रणमा लिइएको छ।
मुख्यमन्त्री सिंहका अनुसार जलाद खोला वन क्षेत्रभित्र पर्छ, जसका कारण उत्खनन गर्नुअघि प्रारम्भिक वातावरणीय परीक्षण प्रतिवेदन आवश्यक पर्छ। यस्तो प्रतिवेदन प्रदेश सरकारको वन तथा वातावरण मन्त्रालयबाट स्वीकृत हुनुपर्ने कानुनी व्यवस्था छ। तर, स्वीकृति नलिई उत्खनन कार्य अघि बढाइएको पाइएको हो।
“वन मन्त्रालयको स्वीकृतिपछि मात्र सम्बन्धित डिभिजन वन कार्यालयले अनुमति दिन सक्छ र त्यसपछि मात्र स्थानीय तहले ठेक्का प्रक्रिया अघि बढाउन सक्छ,” मुख्यमन्त्री सिंहले भन्नुभयो, “मिथिला नगरपालिकाले वातावरणीय अध्ययन प्रतिवेदन स्वीकृत गरेजस्तो देखिएको छ, जुन पूर्ण रूपमा कानुनी प्रक्रियाविपरीत हो।”
अनुमति विना ठेक्का दिएर उत्खनन कार्य सुरु गरिएको पुष्टि भएपछि सम्बन्धित ठेकेदारलाई आवश्यक कागजातसहित प्रदेश सरकारअन्तर्गतको मुख्यमन्त्री तथा मन्त्रिपरिषद् कार्यालयमा हाजिर हुन निर्देशन दिइएको छ।
मुख्यमन्त्री सिंहले वातावरणीय संरक्षण र प्राकृतिक स्रोतको दिगो व्यवस्थापनलाई सरकारको प्राथमिकतामा रहेको दोहोर्याउँदै अवैध उत्खननमा संलग्न जो–कोहीलाई कानुनी दायरामा ल्याइने चेतावनी दिनुभयो।
