त्रिवेणी (नवलपरासी): नवलपरासी (बर्दघाट सुस्तापूर्व) स्थित मध्यविन्दु प्रादेशिक अस्पतालको नयाँ भवन निर्माण गरिएको छ। गण्डकी प्रदेश सरकारको करिब रु १२ करोड लागत र नेपाल हिल्फे संस्थाको रु १८ करोडको सहयोगमा उक्त भवन निर्माण गरिएको हो।
साँघुरो भवनका कारण सेवा दिन कठिनाइ भइरहेको अवस्थामा नयाँ भवन निर्माणसँगै अब सेवा पुर्याउन सहज हुने अस्पतालका मेडिकल सुपरिटेन्डेन्ट डा. रमेशप्रसाद आचार्यले बताउनुभयो। नयाँ भवनबाट केही दिनमा सेवा प्रारम्भ हुनेछ।
पन्ध्र शैय्याको अस्पतालले पुरानो भवनबाट ८० शैय्याको सेवा दिँदै आएको थियो। बिरामीको चाप धेरै भएकाले स्वीकृत दरबन्दीभन्दा बढी शैय्या सञ्चालन गर्नु परेको मेडिकल सुपरिटेन्डेन्ट डा. आचार्यले बताउनुभयो। स्वीकृत दरबन्दी पन्ध्र शैय्याको मात्र हुँदा जनशक्ति अभाव झेल्नु परेको उहाँको भनाइ छ। हाल अस्पतालमा स्थायी, करार र अन्य गरी १६४ कर्मचारी कार्यरत छन्।
सामुदायिक रूपमा सञ्चालित सो अस्पताललाई २०७५ सालमा जिल्ला अस्पतालमा परिणत गरिएको थियो। उक्त समय गण्डकी प्रदेश सरकारले १५ शैय्याको जिल्ला अस्पताल कायम गरेको थियो। प्रदेश सरकारको २०८१ पुस ९ गतेको मन्त्रिपरिषद्को निर्णयले यस अस्पताललाई प्रादेशिक अस्पतालका रूपमा अघि बढाएको हो। अस्पतालले जग्गाको भोगाधिकार प्राप्त गर्न सकेको छैन। जमिन भोगाधिकारका लागि पहल भइरहेको भए पनि अस्पतालको नाममा आउन नसकेको अस्पताल व्यवस्थापन समितिका अध्यक्ष बालकृष्ण घिमिरेले बताउनुभयो। जमिनको भोगाधिकार नहुँदा अन्य दातासँग सहयोग लिन र नयाँ काम सुरु गर्न समस्या भइरहेको उहाँले बताए।
अस्पतालको वार्षिकोत्सव कार्यक्रममा गत फागुन २८ गते गण्डकी प्रदेशका मुख्यमन्त्री सुरेन्द्रराज पाण्डेले सो अस्पताललाई एक सय शैय्याको बनाउने आश्वासन दिनुभएको अध्यक्ष घिमिरेले बताउनुभयो।
