काठमाडौँ: कृषि तथा पशुपन्छी विकासमन्त्री रामनाथ अधिकारीले कृषि क्षेत्रको विकासमा स्थानीय सरकारको महत्त्वपूर्ण भूमिका हुने बताउनुभयो। आगामी आर्थिक वर्षका लागि मन्त्रालयले अघि सारेका नीति, कार्यक्रम, बजेट तर्जुमा र प्राथमिकताका विषयमा धादिङ जिल्लाका स्थानीय तहका प्रमुख तथा उपप्रमुखहरूसँग सिंहदरबारमा छलफल गर्नुहुँदै उहाँले स्थानीय तहबाट प्राप्त सुझावलाई मन्त्रालयले ग्रहण गर्ने प्रतिबद्धता जनाउनुभयो।
सो अवसरमा मन्त्री अधिकारीले आगामी आर्थिक वर्षका लागि मन्त्रालयले अघि सारेका कार्यक्रम र प्राथमिकताहरूलाई स्थानीय सरकारले अपनाउन सक्ने वातावरण सिर्जना गर्न चाहना व्यक्त गर्नुभयो। आगामी बजेटमा कृषि क्षेत्रमा अघि सारिने कार्यक्रमलाई उत्कृष्ट बनाउने प्रयत्न गर्ने प्रतिबद्धता पनि उहाँले व्यक्त गर्नुभयो।
छलफलमा मन्त्री अधिकारीले सरोकारवालाका सुझावको आधारमा मन्त्रालयले आगामी आर्थिक वर्षको कार्यक्रम र प्राथमिकताहरू तय गर्ने बताउनुभयो। मन्त्रालयले काठमाडौँ उपत्यकाभित्रका पालिकाका प्रमुख र उपप्रमुखहरूसँग पनि यस विषयमा शुक्रबार छलफल आयोजना गरेको जानकारी दिनुभयो।
मन्त्रालयमा आज भएको छलफलमा धादिङ जिल्लाका दुई नगरपालिका र ११ गाउँपालिकाका प्रमुख तथा उपप्रमुख, मन्त्रालयका सचिवद्वय डा. गोविन्दप्रसाद शर्मा, डा. राजेन्द्रप्रसाद मिश्र लगायत सहभागी हुनुहुन्थ्यो।
