काठमाडौँ: यस वर्षको वसन्त यामको हिमाल आरोहणका लागि अनुमति दिन प्रक्रिया सुरु गरिएको छ। पर्यटन विभागका अनुसार अन्नपूर्ण-१ सहित विभिन्न हिमाल चुलीहरूको आरोहणका लागि आठ आरोही समूहका १८ महिला र ४० पुरुष गरी कुल ५८ जनाले अनुमति पाएका छन्।
हालसम्म नेपालसहित २४ देशका आरोहीहरूले हिमाल आरोहणका लागि अनुमति लिएका छन्। विभागका निर्देशक लिलाधर अवस्थीले वसन्त यामको हिमाल आरोहणका लागि अनुमति प्रक्रिया सुरु भएको जानकारी दिनुहुन्छ। उहाँले भने, “सगरमाथा आरोहणका लागि अनुमति छिट्टै दिइनेछ। सगरमाथा क्षेत्रको आरोहणमा चहलपहल बढेको छ।”
सगरमाथा आरोहणको व्यवस्थापन तयारीका लागि आरोहण गराउने कम्पनीहरू जुटेका छन्। विभागका अनुसार सगरमाथा आधार शिविरमा स्नो होराइजन्स, पायोनियर, सेभेनसमिट ट्रेक, सेभेन समिट क्लब, एलिट एक्सपेडिशन, हिमालयन गाइड्स, एसियन ट्रेकिङ लगायत कम्पनीहरूले शिविर व्यवस्थापन र अन्य कामहरूको जिम्मा सम्हालेका छन्।
वसन्त ऋतु सगरमाथा र अन्य हिमालहरूको आरोहणका लागि उपयुक्त मौसम मानिन्छ। यस याममा सगरमाथा आरोहणको लागि धेरै विदेशी आरोही आउने अपेक्षा गरिएको छ। वसन्त यामको सगरमाथा आरोहणका लागि मार्ग निर्माण कार्यका लागि सगरमाथा प्रदूषण नियन्त्रण समिति (एसपीसीसी)ले ‘आइसफाल डाक्टर’ पठाएको छ। एसपीसीसीले सगरमाथा आधार शिविरदेखि दोस्रो शिविरसम्मको मार्ग निर्माणका लागि १० जनाको टोली खटाएको हो।
त्यसै गरी, सगरमाथाको दोस्रो शिविरदेखि चुचुरोसम्म डोरी टाँग्ने काम (रोप फिक्सिङ) का लागि दक्ष आरोहीहरू खटिएका छन्। पर्वतारोहण सञ्चालक सङ्घले अशोक लामाको नेतृत्वमा आठ सदस्यीय शेर्पा टोलीलाई सगरमाथाको चुचुरो सम्म डोरी टाँग्नका लागि पठाएको छ। सङ्घका महासचिव ऋषिराम भण्डारीका अनुसार वसन्त ऋतुको सगरमाथा र ल्होत्से हिमाल आरोहणका लागि आरोही केही दिन अघि सगरमाथा गएका छन्। सन् २०२५ को वसन्त ऋतुमा सगरमाथा, ल्होत्से र आमादब्लम हिमाल आरोहणका लागि रोप फिक्सिङको व्यवस्थापन जिम्मेवारी एट्के एक्सपेडिसन कम्पनीले पाएको छ।
