काठमाडौं: प्रमुख तीन दलका शीर्ष नेताहरूले संक्रमणकालीन न्याय (टीआरसी) टुंग्याउन दुई आयोग गठन गर्ने सहमति गरेका छन्। आज सिंहदरबारमा बसेको बैठकमा आयोगहरूको गठन प्रक्रियालाई अघि बढाउने निर्णय भएको हो।
प्रधानमन्त्रीका विज्ञ सल्लाहकार तथा एमाले नेता अग्नि खरेलका अनुसार सरकार सर्च कमिटी गठन प्रक्रिया अघि बढाउने सहमतिमा पुगेको छ। ‘बेपत्ता पारिएका व्यक्तिको छानबिन तथा सत्य निरूपण तथा मेलमिलाप आयोग ऐन २०७१’ अनुसार आयोगका अध्यक्ष तथा सदस्य सिफारिस गर्न समिति गठन गरिनेछ।
गृहमन्त्री रमेश लेखकले पनि नेपाली कांग्रेस, नेकपा एमाले, र माओवादी केन्द्रका शीर्ष नेताहरूबीच संक्रमणकालीन न्यायलाई अघि बढाउन दुई आयोग गठन गर्ने तथा सिफारिस समिति छिट्टै गठन गर्ने सहमति भएको स्पष्ट पारे।
बैठकमा प्रधानमन्त्री केपी शर्मा ओली, कानुनी सल्लाहकार अग्निप्रसाद खरेल, कांग्रेस सभापति शेरबहादुर देउवा, गृहमन्त्री रमेश लेखक, माओवादी केन्द्रका अध्यक्ष पुष्पकमल दाहाल ‘प्रचण्ड’, शक्ति बस्नेत, र खिमलाल देवकोटा सहभागी थिए।
