काठमाडौं: बलुचिस्तानमा बलुच लिबरेशन आर्मी (बीएलए) द्वारा रेल अपहरण गरी २०० भन्दा बढी पाकिस्तानीहरूलाई बन्धक बनाइएको घटनाप्रति चीनले गहिरो चिन्ता व्यक्त गरेको छ। चीनले आक्रमणको निन्दा गर्दै आतंकवाद विरोधी सहयोगलाई सुदृढ पार्ने प्रस्ताव राखेको छ।
चिनियाँ विदेश मन्त्रालयकी प्रवक्ता माओ निङले पाकिस्तानसँग सुरक्षा सहयोग बढाउने प्रस्ताव राख्दै बुधबार आयोजित मिडिया ब्रिफिङमा चीनले घटनाको कडा निन्दा गरेको बताइन्। उनले भनिन्, “चीन सबै प्रकारका आतंकवादी गतिविधिको विरोध गर्दछ। आतंकवादविरुद्धको लडाइँमा पाकिस्तानलाई निरन्तर समर्थन गर्नेछ, ताकि यस क्षेत्रमा शान्ति, सुरक्षा, र स्थायित्व कायम रहोस्।”
चीन-पाकिस्तान आर्थिक करिडोर (CPEC) अन्तर्गत चीनले पाकिस्तानमा ६० अर्ब डलरभन्दा बढी लगानी गरिसकेको छ। परियोजनामा संलग्न चिनियाँ नागरिकहरूमाथि निरन्तर आक्रमण भइरहेका घटनाले बेइजिङलाई थप चिन्तित बनाएको छ।
बीएलएले चीन-पाकिस्तान आर्थिक करिडोरलाई बलुचिस्तानको प्राकृतिक स्रोतसाधन दोहन गर्ने परियोजना भन्दै आलोचना गर्दै आएको छ। यसै कारण, परियोजनासँग सम्बन्धित चिनियाँ नागरिकहरू पटक-पटक आक्रमणको निशानामा परेका छन्।
यसअघि, सुरक्षा सुनिश्चित गर्न चीनले पाकिस्तानसँग आफ्ना सेना पठाउने प्रस्ताव राखेको थियो। तर, पाकिस्तानले उक्त प्रस्ताव अस्वीकार गरेको बताइएको छ। पाकिस्तानमा बढ्दो सुरक्षा चुनौतीका कारण चीनले इस्लामाबादसँग आतंकवाद विरोधी रणनीति सुदृढ पार्ने संकेत गरेको छ।
