काठमाडौँ: राष्ट्रियसभाका अध्यक्ष नारायणप्रसाद दाहालले होली पर्वलाई सभ्य र मर्यादित रूपमा मनाउन आग्रह गर्नुभएको छ। फागु पूर्णिमाका अवसरमा शुभकामना सन्देश जारी गर्दै उहाँले होलीको उल्लासलाई विकृत हुन नदिन सबैलाई सचेत रहन अनुरोध गर्नुभएको छ।
अध्यक्ष दाहालले भन्नुभयो, “सद्भाव, भ्रातृत्व र विविध रङहरूको पर्व फागु पूर्णिमाका अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरूमा हार्दिक शुभकामना व्यक्त गर्दछु। यस पर्वले आपसी मेलमिलाप, भ्रातृत्व र एकताको सन्देश प्रवाह गर्ने विश्वास लिएको छु।”
उहाँले होलीको नाममा जथाभावी लोला हान्ने, फोहर पानी प्रयोग गर्ने, जबरजस्ती रंग लगाउने, हूलहुज्जत गर्ने जस्ता गतिविधिहरू बढ्दै गएकाले सचेत रहनुपर्ने बताउनुभयो।
संस्कृति, सद्भाव र एकताको प्रतीक होली
फागु पूर्णिमा नेपाली समाजका प्रमुख सांस्कृतिक पर्वहरूमध्ये एक हो। पहाडमा पहिलो दिन र तराई–मधेसमा भोलिपल्ट मनाइने यस पर्वलाई विशेषगरी मिथिला क्षेत्र र मधेस प्रदेशमा भव्य रूपमा मनाइन्छ। परिवार, आफन्त र साथीभाइबीच रङ दलेर, टीका लगाएर आपसी सम्बन्ध सुदृढ गर्ने परम्परा छ।
अध्यक्ष दाहालले नेपालका विभिन्न जातजाति, भाषा र समुदायले मनाउने यस पर्वले मनोरञ्जनसँगै भावनात्मक एकता र सामाजिक सद्भावलाई प्रवर्द्धन गर्ने उल्लेख गर्नुभयो।
हाम्रो संस्कृति अनुकरणीय र प्रेरणादायी
उहाँले भन्नुभयो, “पूर्वीय सभ्यता, मौलिक संस्कृति र विविध पर्वहरूको दृष्टिले हामी सम्पन्न छौँ। हाम्रो बहुजातीय, बहुभाषिक, बहुसांस्कृतिक एवं बहुधार्मिक समाज विश्वकै निम्ति अनुकरणीय र प्रेरणादायी छ। यसलाई जगेर्ना गर्दै राष्ट्रिय एकता र सद्भावलाई अझ सुदृढ बनाउनु हाम्रो साझा जिम्मेवारी हो।”
