ढोरपाटन (बागलुङ): बागलुङ, रोल्पा, र पूर्वी रुकुमको सिमानामा पर्ने पातिहाल्ने क्षेत्र आन्तरिक पर्यटकको लोकप्रिय गन्तव्य बन्दै गएको छ। शनिबार बिहानैदेखि यहाँ पर्यटकको चहलपहल बढेको छ। सेताम्य हिउँले ढाकिएको जंगल, सडक, र डाँडा हेर्न तथा हिउँ खेल्न पुगेका पर्यटकले क्षेत्रलाई थप जीवन्त बनाएका छन्।
शुक्रबार बिहानदेखि परेको हिउँले पातिहाल्नेको सौन्दर्य बढाएको छ। बागलुङ, पूर्वी रुकुम, रोल्पा, जाजरकोट, गुल्मी, प्युठान, र बुटवलबाट सयौँ आन्तरिक पर्यटक यहाँ पुगेका छन्। स्थानीय थमबहादुर घर्तीका अनुसार शुक्रबार र शनिबार गरी झण्डै १,२०० पर्यटक हिउँ खेल्न आएका थिए। बाक्लो हिमपातका कारण ठूला सवारीसाधन सञ्चालनमा कठिनाइ भए पनि पर्यटकहरू मोटरसाइकल र जिपमा यात्रा गर्दै यहाँ आइपुगेका छन्।
यस वर्ष दोस्रोपटक परेको हिमपातका कारण पातिहाल्नेमा करिब डेढ फिट हिउँ जमेको छ। “लामो समय खडेरी परेको थियो, गर्मी सुरु हुनै लाग्दा परेको यो हिमपातले धेरैलाई आकर्षित गर्यो,” घर्तीले भने, “हिउँ पग्लिन अझै चार–पाँच दिन लाग्छ, यस अवधिमा पर्यटकको भीड यस्तै रहनेछ।”
यद्यपि बाक्लो हिउँका कारण पर्यटकहरू तिलाचन तालसम्म पुग्न सकेका छैनन्। करिब आधा घण्टाको पैदलयात्रा तय गरे पुग्न सकिने यो ताल पनि सेताम्य देखिन्छ। गलकोटबाट घुम्न आएका विकास क्षेत्रीले पातिहाल्नेको प्राकृतिक सुन्दरताले मन लोभ्याउने बताए। “पहिले लाग्थ्यो, बागलुङ, पूर्वी रुकुम, र रोल्पाको सिमाना धेरै टाढा छ, तर यहाँ दुई घण्टामै आइपुग्न सकिने रहेछ,” उनले भने, “हिउँमा मोटरसाइकल चिप्लिने चुनौती रहे पनि एकै दिन सयौँ पर्यटक हिउँ खेल्न आएका थिए।”
एक दशकअघिसम्म कमै चिनिएको पातिहाल्ने पछिल्लो समय चर्चित गन्तव्य बन्दै गएको छ। राष्ट्रिय गौरवको आयोजना मध्यपहाडी लोकमार्गसँग जोडिएपछि यहाँको पहुँच सहज भएको छ। उच्च पहाडी क्षेत्रमा पर्ने पातिहाल्ने अहिले आन्तरिक पर्यटनको केन्द्र बन्दै गएको छ।
(रासस)
