काठमाडौँ: आज शून्य भेदभाव दिवस तथा समुद्री घाँस दिवस मनाइँदैछ। विश्वभर सबै प्रकारका भेदभाव अन्त्य गर्ने तथा यसप्रति विश्वव्यापी ऐक्यबद्धता जनाउने उद्देश्यले संयुक्त राष्ट्रसङ्घको आह्वानमा शून्य भेदभाव दिवस मनाउन थालिएको हो।
सन् २०२२ देखि संयुक्त राष्ट्रसङ्घकै आह्वानमा समुद्री पारिस्थितिकी प्रणालीको संरक्षणप्रति चेतना जगाउन समुद्री घाँस दिवस मनाउने गरिन्छ। जलवायु परिवर्तनको प्रभाव न्यून गर्न तथा तटीय क्षेत्रका मानिसलाई बाढी र आँधीबेहरीको जोखिमबाट जोगाउन समुद्री घाँसलाई महत्वपूर्ण मानिन्छ।
एचआईभीसम्बन्धी कलंक तथा भेदभाव हटाउनका लागि विश्वव्यापी साझेदारीका रूपमा ४१ देश तथा थुप्रै साझेदारहरूले एकताबद्ध प्रतिबद्धता व्यक्त गरेका छन्। सामुदायिक साझेदारहरूको संलग्नता र नेतृत्वले प्रणालीगत मानव अधिकार अवरोध तथा असमानता हटाउने प्रयासलाई तीव्र बनाएको छ, जसले थप न्यायपूर्ण र समावेशी एचआईभी नियन्त्रण रणनीतिलाई सघाएको छ।
शून्य भेदभाव दिवस समावेशीकरण, स्नेह, शान्ति, लैङ्गिक समानता तथा एचआईभी एड्सविरुद्ध एकताका पक्षमा मनाइन्छ। यस दिन भेदभावरहित समाज निर्माण तथा पीडितलाई सम्मानजनक व्यवहार गर्नुपर्नेमा जोड दिइन्छ।
सीमान्तकृत वर्गका लागि स्वास्थ्य सेवा सुनिश्चित गर्दै सन् २०३० सम्म एचआईभी नियन्त्रणका लक्ष्य हासिल गर्न अभिप्रेरित गर्नु यस दिवसको मुख्य उद्देश्य रहेको छ।
