ढोरपाटन: माथिल्लो बागलुङमा भारी हिमपातका कारण स्थानीय जनजीवन प्रभावित भएको छ। शुक्रबार दिउँसोदेखि सुरु भएको वर्षासँगैको हिमपातले ढोरपाटन नगरपालिका–९ स्थित ढोरपाटन उपत्यका, निसेलढोर, स्यालपाखे, पाखाथर, छ्यान्तुङ, भूजीलगायत क्षेत्रका बासिन्दा प्रभावित बनेका छन्।
निसीखोला गाउँपालिका–६ को जाउलेपानी र पातीहाल्ने क्षेत्रमा समेत भारी हिमपात भएको छ। चिसो बढ्दा स्थानीयको दैनिकी कष्टकर बनेको छ। विशेष गरी निसेलढोर र ढोरपाटन उपत्यकाका बासिन्दा बढी प्रभावित भएको ढोरपाटन नगरपालिका–९ का होटल व्यवसायी गंगाबहादुर भण्डारीले जानकारी दिनुभयो। उहाँका अनुसार शुक्रबार दिउँसो २ बजेदेखि हिमपात सुरु भएको थियो, जसले अहिले ढोरपाटन उपत्यकासहित माथिल्लो क्षेत्रलाई सेताम्य बनाएको छ।
उहाँले भन्नुभयो, “एक-दुई दिनदेखि चिसो अत्यधिक बढेको थियो, आज बाक्लो हिमपात भयो। यहाँका धेरैजसो किसानहरू गाईभैंसी पाल्छन्, उनीहरूलाई पशुहरूलाई दाना र घाँस खुवाउन समस्या परेको छ। पुस-माघ महिनामा हिउँ परेको थिएन, तर फागुन लागेपछि पो बल्ल हिमपात भयो।”
लामो समयको खडेरीपछि भएको हिमपातले किसानहरूलाई भने राहत महसुस गराएको छ। बारीमा लगाएको गहुँ, जौँ, र ज्वाँतो सुकेको देखेर निराश भएका किसानलाई वर्षासहितको हिमपातले आशा जगाएको छ। तर, निरन्तर हिमपात भइरहेकाले ढोरपाटन पुग्ने पर्यटकहरू बुर्तिबाङमै रोकिएको अवस्था छ।
यस्तै, बागलुङ, रोल्पा, र रुकुमको सिमाना पातीहाल्ने क्षेत्रमा भारी हिमपात भएपछि मध्यपहाडी लोकमार्ग अवरुद्ध भएको छ। निसीखोला गाउँपालिका–६ का अध्यक्ष सूर्यमान बुढा मगरका अनुसार दिउँसो एक बजेदेखि हिमपात जारी छ, जसका कारण यातायात सेवा ठप्प भएको छ। पश्चिम नेपालबाट राजधानीसहितका प्रमुख सहरतर्फ जाने सवारी साधनहरू चल्न सकेका छैनन्।
