काठमाडौं: राष्ट्रपति रामचन्द्र पौडेलले ग्याल्पो ल्होसारजस्ता पर्वहरूले नेपाली समाजमा एकता, सामाजिक-सांस्कृतिक ऐक्यबद्धता, सहिष्णुता, सद्भाव र बन्धुत्वको भावना अभिवृद्धि गर्ने उल्लेख गर्नुभएको छ।
शेर्पा समुदायको पर्व ग्याल्पो ल्होसारका अवसरमा स्वदेश तथा विदेशमा रहेका सम्पूर्ण नेपालीलाई सुख, शान्ति एवं समृद्धिको शुभकामना व्यक्त गर्दै उहाँले यस पर्वले बृहत् राष्ट्रिय एकतालाई थप सुदृढ गर्ने विश्वास व्यक्त गर्नुभएको छ।
नेपालका हिमाली क्षेत्रलगायत विभिन्न स्थानमा बसोबास गर्ने आदिवासी शेर्पा समुदाय तथा महायान बौद्ध धर्मावलम्बीहरूले फागुन शुक्लपक्ष प्रतिपदा तिथिका दिन नयाँ वर्षका रूपमा विविध कार्यक्रम आयोजना गरी ग्याल्पो ल्होसार मनाउने गर्छन्।
पारिवारिक जमघट, आफन्त भेटघाट तथा गुथुक, खाप्सेल जस्ता परिकार खानुका साथै हर्षोल्लासका साथ मनाइने यस पर्वले शेर्पा जातिको पहिचान र सांस्कृतिक विशेषतालाई झल्काउने राष्ट्रपतिले उल्लेख गर्नुभएको छ।
संस्कृति, परम्परा र मान्यताका आधारमा मनाइने ग्याल्पो ल्होसारले पारिवारिक माया, सामाजिक सद्भाव तथा एकता कायम राख्न महत्त्वपूर्ण योगदान पुर्याउँदै आएको बताउँदै राष्ट्रपति पौडेलले यस पर्वले सबै नेपालीबीचको एकतालाई अझ सुदृढ गर्दै आर्थिक र सामाजिक रूपमा समृद्ध मुलुक निर्माणका लागि अघि बढ्न प्रेरणा प्रदान गरोस् भन्ने शुभकामना व्यक्त गर्नुभएको छ।
