काठमाडौं: नेपाली कांग्रेसका सभापति शेरबहादुर देउवा भारत भ्रमणमा जाँदै छन्। उनी इण्डिया फाउण्डेसनले प्रयागराजमा आयोजना गर्न लागेको ‘कुम्भ ग्लोबल समिट अन डेभलपमेन्ट एण्ड सस्टेइनबिलीटी’मा सहभागी हुने कार्यक्रम रहेको छ।
शुक्रबार र शनिबार हुने उक्त समिटमा देउवा वक्ताका रूपमा सहभागिता जनाउने छन् भने उत्तर प्रदेशका मुख्यमन्त्री योगी आदित्यनाथलगायत अन्य विशिष्ट व्यक्तिहरू पनि रहनेछन्। बूढानीलकण्ठ स्रोतका अनुसार, देउवा बिहीबार नै भारत प्रस्थान गर्नेछन्।
समिटपछि देउवाले महाकुम्भ मेलामा सहभागी भई गंगा स्नान गर्ने कार्यक्रम रहेको छ।
१४ फागुनमा समापन हुन लागेको कुम्भ मेलामा कांग्रेस महामन्त्री गगन थापा, नेता अर्जुननरसिंह केसी, प्रवक्ता डा. प्रकाशशरण महतलगायत दर्जनौं कांग्रेस नेताहरूले यसअघि नै सहभागिता जनाई गंगा स्नान गरिसकेका छन्।
