भक्तपुर: चाँगुनारायण नगरपालिकाले वैशाख १ गतेदेखि आयोजना गर्न लागेको ‘नगरकोट भ्रमण वर्ष’ सफल पार्न उपत्यका मेयर्स फोरमको ११औँ बैठकले विशेष प्रतिबद्धता जनाएको छ।
नगरकोटमा सोमबार सम्पन्न बैठकमा बागमती प्रदेशका मुख्यमन्त्री, प्रदेश मन्त्रीहरू, नगर प्रमुखहरू, उपप्रमुखहरू तथा जनप्रतिनिधिहरूको सहभागिता रहेको थियो। बैठकले तीनै तहका सरकारबीच समन्वय गर्दै भ्रमण वर्षलाई प्रभावकारी बनाउने निर्णय गरेको छ।
बागमती प्रदेशका मुख्यमन्त्री बहादुरसिंह लामाले भ्रमण वर्ष सफल बनाउन प्रदेश सरकारबाट आवश्यक सहयोग उपलब्ध गराउने प्रतिबद्धता जनाउनुभयो। उहाँले उपत्यका मेयर्स फोरमसँग सहकार्य गर्दै अगाडि बढ्नुपर्नेमा जोड दिनुभयो।
प्रदेशका आर्थिक मामिला तथा योजनामन्त्री कुन्दनराज काफ्लेले स्थानीय तह र प्रदेश सरकारबीच सहकार्य भए मात्र पर्यटन तथा अन्य क्षेत्रमा उल्लेखनीय प्रगति गर्न सकिने बताउनुभयो।
यस्तै, आन्तरिक मामिला तथा कानुनमन्त्री सुरजचन्द्र लामिछानेले नगरकोटको पर्यटन प्रवर्द्धन गर्दै नागरिकको जीवनस्तर उकास्ने र समृद्ध मुलुक निर्माणमा टेवा पुर्याउने लक्ष्य रहेको उल्लेख गर्नुभयो।
बैठकले उपत्यकामा सवारीसाधनको धुवाँ प्रदूषण परीक्षण प्रविधि कार्यान्वयन गर्ने, अस्पतालजन्य फोहर व्यवस्थापन गर्ने तथा स्थानीय तह, प्रदेश सरकार र सङ्घीय सरकारबीचको समन्वयलाई थप सशक्त बनाउने निर्णय पनि गरेको छ।
चाँगुनारायण नगरपालिकाका प्रमुख जीवन खत्रीले नगरकोट भ्रमण वर्षका माध्यमबाट नगरपालिकाको पर्यटन प्रवर्द्धन गर्ने योजना रहेको बताउँदै भ्रमण वर्ष सफल बनाउन प्रदेश सरकार तथा अन्य निकायहरूलाई सहयोगी भूमिका निर्वाह गर्न आग्रह गर्नुभयो।
चाँगुनारायण नगरपालिकाका उपप्रमुख रमेश बुढाथोकीले नगरकोट भ्रमण वर्ष केवल चाँगुनारायण नगरपालिकाको मात्र नभई सम्पूर्ण बागमती प्रदेश र मुलुककै पहिचानलाई उजागर गर्ने अवसर भएको बताउनुभयो।
मेयर्स फोरमका अध्यक्ष चिरिबाबु महर्जनको सभापतित्वमा सम्पन्न बैठकमा उपत्यकाका नगर प्रमुख तथा उपप्रमुखहरूको उपस्थिति रहेको थियो। बैठकमा चाँगुनारायण नगरपालिकाले तयार पारेको वृत्तचित्र प्रदर्शन गरिनुका साथै कीर्तिपुर नगरपालिकाका प्रमुख कृष्णमान डङ्गोललाई पहिलो पटक बैठकमा स्वागत गरिएको थियो।
