जनकपुरधाम: मधेश प्रदेशका मुख्यमन्त्री सतीस कुमार सिंहविरुद्ध जनकपुरधाममा मसाल जुलुस प्रदर्शन गरिएको छ। शुक्रबार साँझ राष्ट्रिय एकता अभियानका युवाहरूले मुख्यमन्त्री सिंहको विरोध गर्दै मसाल जुलुस निकालेका हुन्।
भानु चोकबाट सुरु भएको जुलुस शिव चोक हुँदै जनक चोकमा पुगेर कोण सभामा परिणत भएको थियो। प्रदर्शनकारीहरूले ‘मुख्यमन्त्री सतीस सिंह मुर्दाबाद’, ‘प्रदेश सरकार मुर्दाबाद’ लगायतका नारासमेत लगाए।
अभियानमा संलग्न अक्षय यादवका अनुसार, आर्थिक वर्षको तीन महिना मात्र बाँकी रहँदा समेत मुख्यमन्त्रीले कुनै विकासको काम नगरेको र बजेट खर्च पनि १ प्रतिशत मात्र भएको आरोप लगाउँदै विरोधस्वरूप मसाल जुलुस निकालिएको हो।
उनले मुख्यमन्त्री सिंहले बजेट खर्च र विकास योजनामा ध्यान नदिई निजी अस्पतालहरूको अनुगमनमा मात्रै चासो देखाएको आरोप लगाए। ‘जनताको कामलाई प्राथमिकता दिनुको साटो अन्य विषयमा बढी केन्द्रित भएकाले विरोध गर्नु परेको हो’, यादवले भने।
उनका अनुसार, यसअघि पटक–पटक ज्ञापन पत्र बुझाउँदा पनि मुख्यमन्त्रीले कुनै प्रतिक्रिया नदेखाएको भन्दै विरोधस्वरूप मसाल जुलुस निकालिएको हो।
