काठमाडौँ: जापानले स्वास्थ्य क्षेत्रमा २० हजार नेपाली कामदार लैजाने घोषणा गरेको छ। काठमाडौँमा आयोजित पत्रकार सम्मेलनमा नेपाल र जापानका कम्पनीहरूले ‘नेपाल–जापान सेवा आदान–प्रदान कार्यक्रम’ अन्तर्गत उक्त घोषणा गरेका हुन्।
कार्यक्रममा जापानको जेन्काउ रिसर्च इन्स्टिच्युट, कोजाइ कोसन कर्पोरेसन, प्रोग्रेसिभ स्टाफ एजेन्सी र नेपालका काठमाडौँ विश्वविद्यालय स्कूल अफ मेडिकल साइन्स, सन एन्ड कम्पनी प्रालि र सन्दिपनी ग्रुप अफ एजुकेसनका प्रतिनिधिहरूले समझदारीपत्रमा हस्ताक्षर गरेका थिए।
सन्दिपनी ग्रुप अफ कम्पनीका कार्यकारी निर्देशक नरेश ओझाले स्वास्थ्य सेवामा कामदार आवश्यक भएकाले नेपालीलाई दक्ष बनाउँदै जापानको रोजगारी अवसर प्रदान गर्ने उद्देश्यले यो कार्यक्रम ल्याइएको बताउनुभयो।
उहाँले भन्नुभयो, “यसले जापानमा व्यवस्थित रूपमा रोजगारी खोज्न मदत गर्नेछ। १८ देखि ४५ वर्ष उमेर समूहका व्यक्तिहरू जापानी भाषाको एन–फोर स्तर उत्तीर्ण गरी तोकिएको सीप परीक्षण पास गरेपछि केयरगिभरको रूपमा जान योग्य हुनेछन्।”
पिएसएसका कार्यकारी निर्देशक चिजो मासुदाका अनुसार भाषा र सीप परीक्षण पास गरेका उम्मेदवारहरूलाई अन्तर्वार्तामार्फत छनोट गरिनेछ। “छनोट भएकालाई नेपालमै आवश्यक सूचना प्रविधि र एआईसम्बन्धी तालिम प्रदान गरिनेछ। यसले रोजगारी खोज्नेहरूलाई झन्झटरहित सेवा दिनेछ। उनीहरूले तीनदेखि पाँच वर्षसम्म रोजगारीको अवसर पाउनेछन्,” उहाँले भन्नुभयो।
जापानमा केयरगिभरका रूपमा काम गर्नेहरूले मासिक दुई लाख जापानी येनसम्म आम्दानी गर्न सक्ने जानकारी दिँदै उहाँले यो कार्यक्रमले नेपालीहरूलाई अन्तर्राष्ट्रिय स्तरको स्वास्थ्य सेवा तालिमद्वारा दक्ष जनशक्ति उत्पादन गर्न मदत गर्ने उद्देश्य रहेको बताउनुभयो।
